ബിഗ് ബോസ് മലയാളം സീസണ്‍ 3ലെ മത്സരാര്‍ഥി ഡിംപല്‍ ഭാലിന്‍റെ പിതാവ് അന്തരിച്ചു. ഇന്നലെ രാത്രി ഡല്‍ഹിയില്‍ വച്ചായിരുന്നു അന്ത്യം. ബിഗ് ബോസിലെ മത്സരാര്‍ഥി ആയിരുന്ന ലക്ഷ്‍മി ജയനാണ് മരണവിവരം സ്ഥിരീകരിച്ചത്.

കഴിഞ്ഞ കുറച്ചു ദിവസമായി പനി ബാധിതനായിരുന്നു. കോവിഡ് ആണോയെന്ന് സംശയിക്കുന്നുണ്ട്. പരിശോധനഫലത്തിനായി കാത്തിരിക്കുകയാണ് കുടുംബാംഗങ്ങളെന്നും അടുത്ത വൃത്തങ്ങള്‍ പറഞ്ഞു. അച്ഛന്റെ മരണ വിവരം ഡിംബലിനെ അറിയിക്കാൻ സുഹൃത്തുക്കൾ ബി​ഗ് ബോസ് ഷൂട്ടിങ് നടക്കുന്ന ചെന്നൈയിലെത്തിയിട്ടുണ്ട്. ഡിം​ബൽ ബി​ഗ് ബോസിൽ നിന്നു പുറത്തു പോയേക്കുമെന്നാണ് സൂചനകൾ.  

ഉത്തര്‍പ്രദേശിലെ മീററ്റ് സ്വദേശിയാണ് ഡിംപലിന്‍റെ അച്ഛന്‍. അമ്മ കട്ടപ്പന ഇരട്ടയാര്‍ സ്വദേശിനിയും. മലയാളി ഹൗസ് എന്ന റിയാലിറ്റി ഷോയിലൂടെ ശ്രദ്ധേയയായ തിങ്കൾ ഭാൽ സഹോദരിയാണ്. സണ്ണി വെയ്ൻ നായകനായി അഭിനയിച്ച ‘ച്യൂയിങ്ങ് ഗം’ എന്ന ചിത്രത്തിലൂടെ നായികയായി വെള്ളിത്തിരയിലും തിങ്കൾ അരങ്ങേറ്റം കുറിച്ചു.