സിനിമ താരങ്ങളടക്കമുള്ള സെലിബ്രിറ്റികൾക്കൊപ്പം ഫോട്ടോയെടുക്കുക എന്നത് ആരാധകരെ സംബന്ധിച്ച് വലിയ സന്തോഷം തരുന്ന കാര്യമാണ്. കോവി‍ഡ് കാലത്ത് അടുത്തു നിന്നുള്ള ഫോട്ടെയെടുപ്പും മറ്റും കുറഞ്ഞിട്ടുണ്ട്. ഇപ്പോഴിതാ തനിക്കൊപ്പം ഫോട്ടെയെടുക്കാനുള്ള ഒരു ട്രാഫിക്ക് പൊലീസുകാരന്റെ ശ്രമം കണ്ട് ഞെട്ടിയിരിക്കുകയാണ് ബോളിവുഡ് സുന്ദരി മലൈക അറോറ. 

ട്രാഫിക് പൊലീസ് ഉദ്യോഗസ്ഥൻ തന്നോടൊപ്പം ചിത്രമെടുക്കാൻ അഭ്യർത്ഥിച്ചപ്പോൾ മലൈക അറോറ ഞെട്ടലും അവിശ്വാസവും പ്രകടിപ്പിച്ചു. തന്റെ തൊട്ടടുത്ത് നിന്ന് പൊലീസുകാരൻ മാസ്ക് താഴെക്ക് മാറ്റിയതോടെയാണ് താര സുന്ദരിയുടെ മുഖത്ത് ആശങ്ക പടർന്നത്. ഒരു സെലിബ്രിറ്റി ഫോട്ടോഗ്രാഫർ തിങ്കളാഴ്ച തന്റെ ഇൻസ്റ്റാഗ്രാം അക്കൗണ്ടിൽ പങ്കിട്ട വീഡിയോ വൈറലായി മാറിയിരിക്കുകയാണ് ഇപ്പോൾ.

മലൈക യോഗ ക്ലാസിൽ നിന്ന് പുറത്തു കടന്ന് കാറിൽ കയറാനായി പോകുന്നതിനിടെയാണ് ട്രാഫിക്ക് പൊലീസുകാരൻ ആവശ്യവുമായി എത്തിയത്. മലൈക ആദ്യം ആശ്ചര്യപ്പെട്ടു. പിന്നാലെ ട്രാഫിക്ക് പൊലീസുകാരൻ മാസ്ക് താഴേക്ക് മാറ്റിയതോടെ അവർക്ക് നേരിയ ആശങ്ക അനുഭവപ്പെട്ടുവെന്ന് മുഖ ഭാവത്തിൽ നിന്ന് വ്യക്തം. പിന്നീട് അവർ ഫോട്ടോയ്ക്ക് പോസ് ചെയ്ത് കാറിൽ കയറി മടങ്ങി.