കാറുകളോടുള്ള പൃഥ്വിരാജിന്റെ സ്നേഹം ആരാധകർക്ക് അറിയാവുന്നതാണ്. ലംബോർ​ഗിനി ഉൾപ്പടെ നിരവധി ആഡംബര വാഹനങ്ങളാണ് താരത്തിന്റെ ​ഗാരേജിലുള്ളത്. ഇപ്പോൾ ദുബായ് ഡ്രൈവിങ് ലൈസൻസ് എടുത്തിരിക്കുകയാണ് താരം. ദുബായ് ഡ്രൈവിങ് സെന്റാണ് താരം ലൈസൻസ് എടുത്ത വിവരം പങ്കുവച്ചത്. 

​ഗോൾഡൻ വിസ വഴി ലൈസൻസ്

ഗോൾഡൻ വിസയുള്ളവർക്ക് ഡ്രൈവിങ് ലൈസൻസ് എടുക്കാൻ ക്ലാസുകൾ ഒഴിവാക്കിയിരുന്നു. ടെസ്റ്റുകൾ പാസായാൽ മതിയെന്നാണ് ദുബായ് റോഡ് ഗതാഗത അതോറിറ്റി നേരത്തെ തീരുമാനിച്ചിരുന്നത്. കുറച്ചു നാളുകൾക്ക് മുൻപാണ് പൃഥ്വിരാജിന് ​ഗോൾഡൻ വിസ ലഭിച്ചത്. ഇതോടെയാണ് ദുബായ് ലൈസൻസെടുക്കാൻ താരം തീരുമാനിച്ചത്. റോഡ് ടെസ്റ്റും നോളജ് ടെസ്റ്റും പാസായാണ് പൃഥ്വിരാജ് ദുബായ് ഡ്രൈവിങ് ലൈസൻസ് കരസ്ഥമാക്കിയത്. താരത്തെ അഭിനന്ദിച്ചുകൊണ്ട് ദുബായ് ഡ്രൈവിങ് സെന്റർ സമൂഹമാധ്യമങ്ങളിൽ ചിത്രം പങ്കുവച്ചിട്ടുണ്ട്. കൂടാതെ ദുബായിലൂടെ ആദ്യമായി പൃഥ്വിരാജ് വാഹനമോടിക്കുന്നതിന്റെ വിഡിയോയും പുറത്തുവന്നു.

കടുവയ്ക്കായി കാത്ത് ആരാധകർ

മോഹൻലാലിനൊപ്പമുള്ള ബ്രോ ഡാഡിയാണ് താരത്തിന്റേതായി പുറത്തിറങ്ങിയ അവസാന ചിത്രം. ഡിസ്നി പ്ലസ് ഹോട്ട്സ്റ്റാറിലൂടെ റിലീസ് ചെയ്ത ചിത്രം മികച്ച വിജയം നേടിയിരുന്നു. കടുവ എന്ന ചിത്രത്തിനായുള്ള കാത്തിരിപ്പിലാണ് പൃഥ്വിരാജ് ആരാധകർ. എട്ട് വര്‍ഷത്തെ ഇടവേളയ്ക്കു ശേഷം ഷാജി കൈലാസ് സംവിധാനം ചെയ്യുന്നത്. ആക്ഷൻ താരമായി പൃഥ്വിരാജ് തിരിച്ചെത്തുന്നു എന്നതും ആരാധകരെ ആവേശത്തിലാക്കുന്നുണ്ട്.