ആലിയ ഭട്ടിനെ പ്രധാനകഥാപാത്രമാക്കി സൂപ്പർഹിറ്റ് സംവിധായകൻ സഞ്ജയ് ലീല ബൻസാലി ഒരുക്കുന്ന ഗംഗുഭായ് കത്ത്യവാടിയുടെ ടീസർ പുറത്ത്. റെഡ് സ്ട്രീറ്റിൽ നിന്ന് രാഷ്ട്രീയത്തിലേക്ക് എത്തിയ ​മാഫിയ ക്വീൻ ​ഗം​ഗുഭായിയായാണ് ആലിയ ഭട്ട് ചിത്രത്തിൽ അഭിനയിക്കുന്നത്. പഞ്ച് ഡയലോ​ഗുകളും മാസ് സീനുകളും ഉൾപ്പെടുത്തിക്കൊണ്ടാണ് ടീസർ. മികച്ച പ്രതികരണമാണ് ടീസറിന് ലഭിക്കുന്നത്. സഞ്ജയ് ലീല ബൻസാലിയ്ക്ക് പിറന്നാൾ ആശംസ നേർന്നുകൊണ്ട് ആലിയയാണ് ടീസർ പുറത്തുവിട്ടത്. 

മുംബൈയിലെ റെഡ് സ്ട്രീറ്റായ കാമാത്തിപുര അടക്കിവാണിരുന്ന ഗംഗുഭായിയുടെ  ജീവിത ആസ്പദമാക്കിയാണ് ചിത്രം ഒരുക്കുന്നത്. നേരത്തെ ചിത്രത്തിന്റെ റിലീസ് തിയതി പ്രഖ്യാപിച്ചുകൊണ്ട് പോസ്റ്റർ എത്തിയിരുന്നു.  ജൂലൈ 30-നാണ് ചിത്രം പ്രേക്ഷകരിൽ എത്തുന്നത്. മാഫിയ ക്വീന്‍ എന്ന ടാഗ്ലൈനോടെയാണ് ചിത്രം പുറത്തിറങ്ങുന്നത്. ഗംഗുഭായിയുടെ കൗമാരകാലവും മധ്യവയസ്‌കയാകുന്ന കാലവും ആലിയ ചിത്രത്തിലൂടെ അവതരിപ്പിക്കുന്നു. ഈ രണ്ട് ലുക്കിലുമുള്ള ആലിയയുടെ ഫോട്ടോ ആലേഖനംചെയ്ത ചിത്രത്തിന്റെ പോസ്റ്ററുകള്‍ നേരത്തേ പുറത്തുവന്നിരുന്നു. ശന്തനു മഹേശ്വരി, അജയ് ദേവ്ഗണ്‍, വിജയ് റാസ്, ഹുമ ഖുറേഷി, ഇമ്രാന്‍ ഹഷ്മി, രോഹിത് സുഖ്വാനി എന്നിവരാണ് ചിത്രത്തിലെ താരങ്ങള്‍. 

മാഫിയ ക്വീന്‍സ് ഓഫ് മുംബൈ; സ്റ്റോറീസ് ഓഫ് വിമണ്‍ ഫ്രം ദ ഗ്യാങ്‌ലാന്‍ഡ്‌സ് എന്ന പേരില്‍ ഹുസൈന്‍ സെയ്ദി, ജെയിന്‍ ബോര്‍ഗസ് എന്നിവര്‍ രചിച്ച പുസ്തത്തിലാണ് ഗംഗുഭായിയുടെ ജീവിതം പറയുന്നത്. ബോംബെ നഗരത്തെ വിറപ്പിച്ച 13 വനിതകളുടെ ജീവിതത്തിലൂടെയുള്ള യാത്രയാണ് ഈ പുസ്തകം. ഈ പുസ്തകത്തിലെ ഒരധ്യായമാണ്  സഞ്ജയ് ലീല ബന്‍സാലിയുടെ സിനിമയ്ക്ക് പ്രചോദനമായത്.