അന്തരിച്ച വിഖ്യാത ഗായിക ലതാ മങ്കേഷ്‌കർക്കൊപ്പമുള്ള ബാല്യകാല ഓർമ്മകൾ പങ്കുവച്ച് സഹോദരിയും ഗായികയുമായ ആശാ ഭോസ്ലെ. കുട്ടിക്കാലത്ത് ഒന്നിച്ചെടുത്ത ചിത്രം പങ്കുവച്ച് ഒരുമിച്ച് ചിലവഴിച്ച നാളുകൾ ഓർത്തെടുക്കുകയായിരുന്നു ആശാ ഭോസ്ലെ. സഹോദരിയുടെ സംസ്‌കാര ചടങ്ങുകൾക്ക് ശേഷമാണ് ഇൻസ്റ്റഗ്രാം പേജിൽ ചിത്രം പങ്കുവച്ചിരിക്കുന്നത്. 

ഒരു ബ്ലാക്ക് ആൻഡ് വൈറ്റ് ചിത്രമാണ് ഇത്. "എത്ര മനോഹരമായ കുട്ടിക്കാലമായിരുന്നു അത്, ദീദിയും ഞാനും" എന്നാണ് അടിക്കുറിപ്പായി എഴുതിയിരിക്കുന്നത്. താരങ്ങളടക്കം നിരവധിപ്പേർ ചിത്രത്തിന് കമന്റുകൾ കുറിച്ചിട്ടുണ്ട്. ഇരുവരോടും ഒരുപാട് ബഹുമാനം ഉണ്ടെന്നും ലതാ ജിയെ മിസ് ചെയ്യുമെന്നും ആരാധകർ കുറിച്ചു. 

പണ്ഡിറ്റ് ദീനനാഥ് മങ്കേഷ്‌കർ, ഷേവന്തി മങ്കേഷ്‌കർ എന്നിവരുടെ മകളാണ് ലതാ മങ്കേഷ്‌കർ. മീന, ഉഷ, ഹൃദയനാഥ് എന്നിവരാണ് മറ്റു സഹോദരങ്ങൾ. കരിയറിൽ 50 പാട്ടുകളിൾ ലതയും ആശയും ഒന്നിച്ചിട്ടുണ്ട്.