സൗന്ദര്യം വർധിപ്പിക്കാനുള്ള ശസ്ത്രക്രിയയ്ക്ക് വിധേയയായ ബ്രസീലിയൻ ​ഗായിക ഡാനി ലി അന്തരിച്ചു. 42 വയസായിരുന്നു. ശസ്ത്രക്രിയയ്ക്കു ശേഷമുണ്ടായ സങ്കീർണതകളെത്തുടർന്നാണ് മരണം.

ശരീരത്തിൽ അടിഞ്ഞുകൂടിയ കൊഴുപ്പ് നീക്കം ചെയ്യുന്ന ലിപോസക്ഷൻ ശസ്ത്രക്രിയയ്ക്കാണ് ​ഗായിക വിധേയയായത്. വെള്ളിയാഴ്ചയാണ് ശസ്ത്രക്രിയ നടക്കുന്നത്. വയറിലും പിൻഭാ​ഗത്തുമാണ് ലിപോസക്ഷൻ ശസ്ത്രക്രിയ നടത്തിയത്. കൂടതെ സ്തന വലിപ്പം കുറയ്ക്കാനുള്ള ശസ്ത്രക്രിയയ്ക്കും വിധേയയായിരുന്നു.

പിന്നാലെ ഡാനി ലിയുടെ അവസ്ഥ മോശമാകുകയായിരുന്നു. ഉടൻ മറ്റൊരു ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല. ​ഗായികയുടെ മരണ കാരണം എന്താണ് എന്നതിനേക്കുറിച്ച് സ്ഥിരീകരണമായിട്ടില്ല. ​അന്വേഷണം ആരംഭിച്ചു. ‌‌‌‌

‘ഐ ആം ഫ്രം ദ് ആമസോണ്‍’ എന്ന ആൽബത്തിലൂടെയാണ് ഡാനി ലി ലോകശ്രദ്ധ നേടിയത്. ആമസോൺ കാട്ടിലെ അഫുഅയിൽ ജനിച്ച താരം ടാലന്റ് ഷോയിലൂടെയാണ് പ്രശസ്തിയിലേക്ക് എത്തുന്നത്. രണ്ട് മാസം മുൻപാണ് അവസാന ​ആൽബം പുറത്തിറക്കുന്നത്. ഭര്‍ത്താവും ഏഴ് വയസുള്ള മകളുമുണ്ട്.