പ്രധാനമന്ത്രി നരേന്ദ്രമോദി അതിഥിയായി എത്തിയ പരിപാടിയില്‍ സ്‌നേഹത്തെക്കുറിച്ചുള്ള നടി ഐശ്വര്യ റായ് ബച്ചന്റെ വാക്കുകള്‍ വൈറലായി മാറിയിരുന്നു. സ്‌നേഹത്തിന്റെ മതം മാത്രമേയുള്ളൂവെന്നായിരുന്നു ഐശ്വര്യ പറഞ്ഞത്. ഐശ്വര്യയുടെ വാക്കുകള്‍ക്ക് സോഷ്യല്‍ മീഡിയ കയ്യടികളുമായി ഓടിയെത്തുകയും ചെയ്തു. ഐശ്വര്യയുടെ വൈറല്‍ പ്രസംഗം സോഷ്യല്‍ മീഡിയയില്‍ വീണ്ടും ചര്‍ച്ചയാവുകയാണ്.

കുറച്ച് ദിവസം മുമ്പ് നടി ശില്‍പ ഷെട്ടി നടത്തിയ പരാമര്‍ശത്തോട് ഐശ്വര്യയുടെ വാക്കുകള്‍ ചേര്‍ത്തുവച്ച് താരതമ്യം ചെയ്യുകയാണ് സോഷ്യല്‍ മീഡിയ. ഐശ്വര്യയുടെ വാക്കുകള്‍ സ്‌നേഹത്തേയും സാഹോദര്യത്തേയും കുറിച്ചുള്ളതായിരുന്നുവെങ്കില്‍ ശില്‍പയുടേത് ഹിന്ദുത്വയുടെ വാക്കുകളാണെന്നാണ് സോഷ്യല്‍ മീഡിയ പറയുന്നത്.

''ഒരു ജാതിയേയുള്ളൂ, അത് മനുഷ്യത്വത്തിന്റെ ജാതിയാണ്. ഒരു മതമേയുള്ളൂ, അത് സ്‌നേഹത്തിന്റെ മതമാണ്. ഒരു ഭാര്യയേയുള്ളൂ, അത് ഹൃദയത്തിന്റെ ഭാഷയാണ്'' എന്നാണ് ഐശ്വര്യ റായ് പറഞ്ഞത്. സത്യസായി ബാബയുടെ ജന്മശതാബ്ദി ആഘോഷത്തില്‍ പങ്കെടുത്ത് സംസാരിക്കുകയായിരുന്നു ഐശ്വര്യ റായ്. പ്രധാനമന്ത്രിയായിരുന്നു ചടങ്ങിലെ മുഖ്യാതിഥി.

ഐശ്വര്യയുടെ ഈ വാക്കുകള്‍ ഉപയോഗിച്ച് കുറച്ച് ദിവസം മുമ്പൊരു പരിപാടിയില്‍ പങ്കെടുത്ത് ശില്‍പ ഷെട്ടി പറഞ്ഞ വാക്കുകളെ വിമര്‍ശിക്കുകയാണ് സോഷ്യല്‍ മീഡിയ. ''ഞാന്‍ ഇവിടെ എന്തിന് വന്നുവെന്ന് ചോദിച്ചാല്‍ ഞാന്‍ പറയും, ഞാന്‍ ക്ഷത്രിയയാണ്, ഞാന്‍ ഹിന്ദുവാണ്. സനാതനം എന്റെ ധര്‍മമാണ്. ഞാനത് അത് മുന്നോട്ട് കൊണ്ടു പോവുക തന്നെ ചെയ്യും'' എന്നാണ് ശില്‍പ ഷെട്ടി പറഞ്ഞത്. സനാതന്‍ ഹിന്ദു എക്ത പദയാത്രയില്‍ സംസാരിക്കുകയായിരുന്നു ശില്‍പ ഷെട്ടി.

ഇരു വിഡിയോകളും ചേര്‍ത്തുവച്ച് താരതമ്യം ചെയ്യുകയാണ് സോഷ്യല്‍ മീഡിയ ഇപ്പോള്‍. 'ഐശ്വര്യ റായ് യഥാര്‍ത്ഥ ഇന്ത്യന്‍ മൂല്യമാണ് ഉയര്‍ത്തിപ്പിടിക്കാന്‍ ശ്രമിച്ചത്, ഐശ്വര്യയുടേതാണ് രാജ്യസ്‌നേഹം. ശില്‍പയുടേത് അന്ധഭക്തിയാണ്, ഐശ്വര്യയുടെ വാക്കുകള്‍ മതേതരത്വത്തിന്റേതായിരുന്നു, ശില്‍പയുടേത് തീവ്രഹിന്ദുത്വയുടേതും' എന്നാണ് സോഷ്യല്‍ മീഡിയ പറയുന്നത്.