'കാഴ്ച' എന്ന ചിത്രത്തിലൂടെ മലയാളികളുടെ മനസിൽ ഇടം നേടിയ താരമാണ് യഷ് മാളവ്യ. ചിത്രത്തിലെ കൊച്ചുണ്ടാപ്രി എന്ന കഥാപാത്രത്തെ മലയാളികൾ ഒരിക്കലും മറക്കാനിടയില്ല. ​ഗുജറാത്ത് സ്വദേശിയായ യഷ് കുടുംബത്തിനൊപ്പം വർഷങ്ങളായി കേരളത്തിൽ തന്നെയാണ് ജീവിക്കുന്നത്. കാഴ്ചയ്ക്ക് ശേഷം 'മൂന്നാമതൊരാൾ' എന്ന ചിത്രത്തിലും യഷ് അഭിനയിച്ചിരുന്നു.

ഇപ്പോഴിതാ 'കാഴ്ച'യിലെ ഇമോഷണൽ രം​ഗങ്ങളിലൊന്നും കരയാനായി താൻ ​ഗ്ലിസറിൻ ഉപയോ​ഗിച്ചിരുന്നില്ല എന്ന് പറയുകയാണ് യഷ്. സെല്ലുലോയ്ഡ് മാ​ഗസിന് നൽകിയ അഭിമുഖത്തിൽ സംസാരിക്കുകയായിരുന്നു യഷ്. "ബ്ലെസി സാറിന് വേണ്ടത് നാച്വറൽ ആയിട്ടുള്ള അഭിനയമാണ്.

സാർ അപ്പോൾ എന്നോട് എന്താണ് ചെയ്യേണ്ടതെന്ന് കൃത്യമായി പറഞ്ഞു തരും. എന്റെ കൂടെ ട്രാൻസ്‌ലേറ്ററുമുണ്ടായിരുന്നു. അദ്ദേഹം ആ സമയത്ത് മുഴുവൻ സീനുകളും എനിക്ക് മനസിലാക്കി തരും. അങ്ങനെയാണ് എന്നെ അഭിനയിപ്പിച്ചത്. പിന്നെ ഞാൻ കരയുന്ന സീനുമൊക്കെ നാച്വറൽ ആയിരുന്നു. ഞാൻ ​ഗ്ലിസറിൻ ഉപയോ​ഗിച്ചിട്ടില്ല.

എന്നെ കരയിപ്പിച്ചതാണ്. എന്റെ അച്ഛനെയും അമ്മയെയും കൊണ്ടുപോയി ഒരു റൂമിൽ പൂട്ടിയിട്ടു. പിന്നെ പറഞ്ഞു എന്റെ അച്ഛനും അമ്മയും വരില്ല എന്ന്. അങ്ങനെയാണ് എന്നെ കരയിപ്പിച്ചത്. ബ്ലെസി സാർ അങ്ങനെ പറഞ്ഞപ്പോൾ, ഞാൻ കരഞ്ഞു.

'കാഴ്ച'യിലെ ക്ലൈമാക്സ് സീനൊക്കെ ​ഗുജറാത്തിൽ പോയി, ഭൂകമ്പത്തിന്റെ സംഭവങ്ങളൊക്കെ ഒറിജിനലായി തന്നെയാണ് നമ്മൾ ഷൂട്ട് ചെയ്തത്. അത് ഭയങ്കര വേദനിപ്പിക്കുന്ന ഒന്നായിരുന്നു. ഒരുപാട് പേർ അവിടെ മരിച്ചിരുന്നു. ആ ഇമോഷനിലാണ് അദ്ദേഹം ഷൂട്ട് ചെയ്തത്". - യഷ് പറഞ്ഞു.