നടി പ്രിയങ്ക ചോപ്രയുടെ അനിയന്‍ സിദ്ധാര്‍ഥ് ചോപ്രയുടെയും കാമുകി ഇഷിതയുടെയും വിവാഹം വാര്‍ത്തകളില്‍ നിറഞ്ഞു നില്‍ക്കുന്ന ഒന്നാണ്. സഹോദരന്റെ വിവാഹാഘോഷങ്ങളില്‍ പങ്കെടുക്കാനാണ് പ്രിയങ്ക മുംബൈയിലെത്തിയതും. എന്നാല്‍ സിദ്ധാര്‍ഥ്-ഇഷിത വിവാഹം മാറ്റിവച്ചതായാണ് ഏറ്റവും പുതിയ റിപ്പോര്‍ട്ടുകള്‍. 

വിവാഹത്തോട് അടുത്ത ദിവസങ്ങളില്‍ ഇഷിത ഒരു ശസ്ത്രക്രിയക്ക് വിധേയയാകുന്നതുകൊണ്ടാണ് വിവാഹതിയതി മാറ്റാന്‍ തീരുമാനിച്ചത്. ഇതിനിടയില്‍ ഇരുവരുടെയും വിവാഹം വേണ്ടെന്നുവച്ചു എന്ന തരത്തിലുള്ള വാര്‍ത്തകളും പ്രചരിച്ചിരുന്നു. അത് സത്യമല്ലെന്നും വിവാഹത്തിനായി മറ്റൊരു നല്ല മുഹൂര്‍ത്തം കണ്ടെത്താനാണ് രണ്ട് വീട്ടുകാരും ആലോചിക്കുന്നതെന്നും ഇവരുമായി അടുത്ത വൃത്തങ്ങള്‍ പറയുന്നു. 

ഭര്‍ത്താവ് നിക് ജൊനാസിനൊപ്പം യുഎസില്‍ താമസിക്കുന്ന പ്രിയങ്ക അനിയന്റെ വിവാഹത്തിനായാണ് അടുത്തിടെ നാട്ടിലെത്തിയത്. എന്നാല്‍ ഇന്നലെ വോട്ട് ചെയ്ത ശേഷം രാത്രി വൈകിയുള്ള വിമാനത്തില്‍ പ്രിയങ്ക മുംബൈയില്‍ നിന്ന് യുഎസ്സിലേക്ക് പറന്നു. 

ഈ വര്‍ഷം ഫെബ്രുവരിയിലായിരുന്നു സിദ്ധാര്‍ഥ്-ഇഷിത വിവാഹനിശ്ചയം. നിക്കും പ്രിയങ്കയുമടക്കം കുടുംബാംഗങ്ങളെല്ലാം ചേര്‍ന്ന് ആഘോഷമായാണ് ചടങ്ങുകള്‍ നടത്തിയത്. ഇരുവരും വര്‍ഷങ്ങളായി പ്രണയത്തിലാണ്.