പനാജി: ബോളിവുഡ് നായിക സറീന്‍ ഖാന്റെ കാറിടിച്ച് ബൈക്ക് യാത്രികന്‍ മരിച്ചു. ഗോവയില്‍ വെച്ചുണ്ടായ അപകടത്തില്‍ 31 കാരനായ നിതേഷ് ആണ് മരിച്ചത്. പടിഞ്ഞാറന്‍ ഗോവയിലെ ബീച്ചിന് സമീപമുള്ള അഞ്ജുന ഗ്രാമത്തില്‍ ബുധനാഴ്ച രാത്രിയോടെയാണ് സംഭവമുണ്ടായത്. 

ഗോവയിലെ മപുസ സ്വദേശിയാണ് മരിച്ച നിതേഷ്. ഇയാള്‍ സഞ്ചരിച്ച സ്‌കൂട്ടര്‍ താരത്തിന്റെ കാറിലേക്ക് ഇടിച്ചു കയറുകയായിരുന്നു എന്നാണ് പുറത്തുവരുന്ന റിപ്പോര്‍ട്ടുകള്‍. അപകടം സംഭവിച്ചതിനുശേഷം ഉടന്‍തന്നെ ഇയാളെ അടുത്തുള്ള ആശുപത്രിയില്‍ പ്രവേശിപ്പിച്ചെങ്കിലും മരിക്കുകയായിരുന്നു. തലയ്ക്ക് ഗുരുതരമായി പരുക്കേറ്റതാണ് മരണത്തിന് കാരണമായത്. അപകട സമയത്ത് സറീന്‍ ഖാനും െ്രെഡവര്‍ അലി അബ്ബാസുമാണ് കാറില്‍ ഉണ്ടായിരുന്നത്. അന്വേഷണം ആരംഭിച്ചതായി പൊലീസ് പറഞ്ഞു. 

സല്‍മാന്‍ ഖാന്‍ നായകനായെത്തിയ വീര്‍ എന്ന ഹിന്ദി ചിത്രത്തിലൂടെയാണ് സറീന്‍ ഖാന്‍ ബോളിവുഡിലേക്ക് എത്തുന്നത്. തുടര്‍ന്ന്  ഹേറ്റ് സ്‌റ്റോറി, ഹൗസ് ഫുള്‍ 2 തുടങ്ങി നിരവധി ഹിറ്റ് ചിത്രങ്ങളില്‍ അഭിനയിച്ചു.