കൊച്ചി: മോഹന്‍ലാല്‍ നായകനാകുന്ന 1971 ബിയോണ്ട് ബോര്‍ഡേര്‍സ് സിനിമയുടെ ട്രെയിലര്‍ നേരത്തെ ഇറങ്ങിയെങ്കിലും പുതിയൊരു ദൃശ്യാനുഭവം നല്‍കുന്ന ട്രെയിലര്‍ വീഡിയോ മോഹന്‍ലാല്‍ പുറത്തുവിട്ടു. 360 ഡിഗ്രിയില്‍ കാണാവുന്ന മട്ടിലുള്ള വീഡിയോയില്‍ മോഹന്‍ലാലും മേജര്‍ രവിയും ഇരുന്ന് ട്രെയിലര്‍ കാണുകയാണ്. സ്‌ക്രീന്‍ തിരിച്ചാല്‍ മോഹന്‍ലാലിന്റെ പിന്നില്‍ നിന്നുകൊണ്ട് അദ്ദേഹത്തിന്റെ പ്രതികരണത്തിനൊപ്പം ട്രെയിലറും കാണാം. മോഹന്‍ലാല്‍ ഫെയ്‌സ്ബുക്കിലാണ് ഈ വീഡിയോ പോസ്റ്റ് ചെയ്തിരിക്കുന്നത്.
മോഹന്‍ലാലിനൊപ്പം ഇരുന്ന് ട്രെയിലര്‍ കാണുന്ന പ്രതീതിയാണുള്ളത്. വി.ആര്‍. സ്റ്റുഡിയോയാണ് ഈ സജ്ജീകരണം ഒരുക്കിയതെന്ന് അവര്‍ക്ക് നന്ദിയോടെ ലാല്‍ പോസ്റ്റ് ചെയ്തു. പോസ്റ്റിനു കീഴിലുള്ള കമന്റില്‍ ചിലര്‍ മോഹന്‍ലാലിനെ നോക്കിയിരിക്കുകയായിരുന്നുവെന്നും ട്രെയിലര്‍ കണ്ടില്ലെന്നും പറയുന്നു. ഒരു പുത്തന്‍ ദൃശ്യാനുഭവമാണ് ഈ വീഡിയോ.