ഒറ്റ കണ്ണിറുക്കല്‍ കൊണ്ട് ലോകമെങ്ങും തരംഗമായ താരമാണ് പ്രിയ വാര്യര്‍ എന്ന മലയാളി പെണ്‍കുട്ടി. ഒമര്‍ ലുലു സംവിധാനം ചെയ്യുന്ന 'ഒരു അഡാര്‍ ലവ്' എന്ന ചിത്രത്തിലെ 'മാണിക്യ മലരായ പൂവി' എന്ന ഗാനരംഗമാണ് സിനിമ പുറത്തിറങ്ങും മുന്‍പ് പ്രിയയെ വൈറലാക്കിയത്. ഇന്ന് നിരവധി ബ്രാന്റുകളുടെ മോഡലാണ് പ്രിയ. തന്റെ ആദ്യ ചിത്രം റിലീസ് ആകും മുമ്പേ ബോളിവുഡില്‍ അരങ്ങേറ്റം കുറിക്കാനൊരുങ്ങുകയാണ് പ്രിയ. 
 
'ശ്രീദേവി ബംഗ്ലാവ്' എന്ന ബിഗ് ബജറ്റ് ചിത്രത്തിലൂടെയാണ് പ്രിയ ബോളിവുഡില്‍ ചുവടുവയ്ക്കുന്നത്. 70 കോടി രൂപ ബജറ്റില്‍ നിര്‍മ്മിക്കുന്ന ചിത്രം മലയാളിയായ പ്രശാന്ത് മാമ്പുള്ളി ആണ് സംവിധാനം ചെയ്യുന്നത്. ചിത്രം പൂര്‍ണമായും യുകെയിലാണ് ചിത്രീകരിക്കുന്നത്. എന്നാല്‍ ഈ ചിത്രത്തിന് മുമ്പ് പ്രിയ ബോളിവുഡില്‍ എത്തുന്നുവെന്ന തരത്തില്‍ വാര്‍ത്തകള്‍ പ്രചരിച്ചിരുന്നു. ബോളിവുഡ് സൂപ്പര്‍ താരം രണ്‍വീര്‍ സിംഗിനൊപ്പമാണ് പ്രിയ എത്തുക എന്നായിരുന്നു വാര്‍ത്ത. ഇതുസംബന്ധിച്ച് ഔദ്യോഗികമായി സ്ഥിരീകരണം ഒന്നും ഉണ്ടായില്ല.