ഷെയ്ന്‍ നിഗം നായകനായി എത്തുന്ന വലിയപെരുന്നാളിന്റെ ട്രെയിലര്‍ പുറത്ത്. വിന്റേജ് സ്റ്റൈലില്‍ കളര്‍ഫുളായാണ് ട്രെയിലര്‍. നിര്‍മാതാക്കളുമായി ബന്ധപ്പെട്ട വിവാദങ്ങള്‍ ചൂടുപിടിച്ചിരിക്കെയാണ് ട്രെയിലര്‍ പുറത്തുവരുന്നത്. കഥാപാത്രങ്ങളും കഥാസന്ദര്‍ഭങ്ങളും തികച്ചും സങ്കല്‍പ്പികമാണെന്ന് മുന്നറിയിപ്പിലാണ് വിഡിയോ തുടങ്ങുന്നത്. മയക്കുമരുന്നുമായി ബന്ധപ്പെട്ട ഡയലോഗുകളും വിഡിയോയില്‍ ഉള്‍പ്പെടുത്തിയിട്ടുണ്ട്. 

ശബ്ദസാന്നിധ്യമാണ് നടന്‍ വിനായകനും ട്രെയിലറില്‍ നിറഞ്ഞുനില്‍ക്കുന്നുണ്ട്. മലയാള സിനിമയുടെ പ്രിയതാരം ക്യാപ്റ്റന്‍ രാജുവിന്റെ സ്മരണകളോടെയാണ് ട്രെയ്‌ലര്‍ എത്തിയിരിക്കുന്നത്. 1.50 മിനിറ്റ് ദൈര്‍ഘ്യമുള്ള ട്രെയിലര്‍ ഇതിനോടകം ആരാധകര്‍ ഏറ്റെടുത്തുകഴിഞ്ഞു. ഷെയ്‌നിന് പിന്തുണയുമായി നിരവധി പേരാണ് കമന്റ് ചെയ്തിരിക്കുന്നത്. ഡിസംബര്‍ 20നാണ് ചിത്രം റിലീസ് ചെയ്യുന്നത്. 

നവാഗതനായ ഡിമല്‍ ഡെന്നീസ് സംവിധാനം ചെയ്യുന്ന ചിത്രം നിര്‍മിച്ചിരിക്കുന്നത് മാജിക് മൗണ്ടെയിന്‍ സിനിമാസിന്റെ ബാനറില്‍ അന്‍വര്‍ റഷീദും മോനിഷ രാജീവും ചേര്‍ന്നാണ്. ഡിമലും തസ്രിഖ് അബ്ദുള്‍ സലാമും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ജോജു ജോര്‍ജ്, സൗബിന്‍ സാഹിര്‍, വിനായകന്‍ തുടങ്ങിയ പ്രധാന താരങ്ങളും ചിത്രത്തില്‍ അണിനിരക്കുന്നുണ്ട്.