മോഹന്‍ലാല്‍-പൃഥ്വിരാജ്-മുരളിഗോപി കൂട്ടുകെട്ടില്‍ പുറത്തിറങ്ങിയ  ലൂസിഫറിലെ അവസാനത്തെ കാരക്ടര്‍ പോസ്റ്റര്‍ പുറത്ത്. മോഹന്‍ലാല്‍ അവതരിപ്പിക്കുന്ന ഖുറേഷി അബ്രാം എന്ന കഥാപാത്രത്തിന്റെ പോസ്റ്ററാണ് പുറത്തു വിട്ടത്.  പോസ്റ്റർ  രണ്ടു  മണിക്കൂറിനിടെ 32,000 പേരാണ് കണ്ടത്. 

'അവസാനം എന്നത് തുടക്കം മാത്രമാണ്' എന്ന ക്യാപ്ഷനോടെയാണ് പോസ്റ്റര്‍ പങ്കുവച്ചിരിക്കുന്നത്. ഇത് ചിത്രത്തിന് രണ്ടാം ഭാഗം വരും എന്ന സൂചനയാണ് നല്‍കുന്നതെന്നാണ് ആരാധകരുടെ വിലയിരുത്തൽ. പല കാര്യങ്ങളിലും ചോദ്യങ്ങള്‍ ബാക്കിയാക്കി ചിത്രം അവസാനിപ്പിച്ചത് രണ്ടാം ഭാഗം ഒരുക്കുന്നതിന് വേണ്ടിയാണെന്ന വാദങ്ങൾ നേരത്തെ മുതൽ സജീവമായിരുന്നു. കാരക്ടർ പോസ്റ്ററിലെ വാചകം ഈ വാദത്തെ കൂടുതൽ സജീവമാക്കുകയാണ്.

സ്റ്റീഫൻ നെടുമ്പള്ളി, ഖുറേഷി അബ്രാം എന്നീ കഥാപാത്രങ്ങളാണ്  ലൂസിഫറിൽ മോഹൻലാൽ വേഷമിട്ടത്. ചിത്രത്തിലെ ഇരുപത്തിയൊമ്പത് കഥാപാത്രങ്ങളുടെ കാരക്ടര്‍ പോസ്റ്ററുകള്‍ നേരത്തെ പല ദിവസങ്ങളിലായി പുറത്തു വിട്ടിരുന്നു .

മാര്‍ച്ച് 28-നാണ് ലൂസിഫര്‍ തീയേറ്ററുകളില്‍ എത്തിയത്. മോഹന്‍ലാലിനെ കൂടാതെ മഞ്ജു വാര്യര്‍, വിവേക് ഒബ്​റോയ്, ഇന്ദ്രജിത്ത്, ടൊവിനോ തോമസ് തുടങ്ങി ഒരു വമ്പന്‍ താരനിര തന്നെ ചിത്രത്തിലുണ്ട്. തിയേറ്ററുകൾ നിറഞ്ഞോടുന്ന ചിത്രം ഇതിനകം തന്നെ നൂറുകോടി ക്ലബിൽ ഇടംപിടിച്ചു.