ലുധിയാന: രാമയണം രചിച്ച വാല്‍മീകിക്കെതിരായ പരാമര്‍ശത്തിന്റെ പേരില്‍ ബോളിവുഡ് താരം രാഖി സാവന്തിനെതിരെ അറസ്റ്റ് വാറണ്ട്. മാര്‍ച്ച് 9ന് ലുധിയാന കോടതിയാണ് രാഖിക്കെതിരെ അറസ്റ്റ് വാറണ്ട് പുറപ്പെടുവിച്ചിരിക്കുന്നത്. 

വാല്‍മീകി വിഭാഗത്തിന്റെ വികാരങ്ങളെ വ്രണപ്പെടുത്തുന്നതാണ് രാഖിയുടെ പരാമര്‍ശം എന്ന പരാതിയിലാണ് കോടതി അറസ്റ്റ് വാറണ്ട് ഇറക്കിയിരിക്കുന്നത്. കഴിഞ്ഞ വര്‍ഷം സ്വകാര്യ ടെലിവിഷന്‍ ചാനലിലെ പരിപാടിയില്‍ പങ്കെടുക്കവെയായിരുന്നു രാഖിയുടെ വിവാദ പരാമര്‍ശം. 

പൊലീസ് ഉദ്യോഗസ്ഥര്‍ രാഖി സാവന്തിനെ അറസ്റ്റ് ചെയ്യുന്നതിനായി ലുധിയാനയിലേക്ക് തിരിച്ചതായി ലുധിയാന പൊലീസ് വ്യക്തമാക്കി. മാര്‍ച്ച് 9ന് കോടതിയില്‍ ഹാജരാകാന്‍ കോടതി നിര്‍ദേശിച്ചിരുന്നെങ്കിലും രാഖി എത്തിയില്ല. ഇതിനെ തുടര്‍ന്നാണ് അറസ്റ്റ് വാറണ്ട്. ഏപ്രില്‍ 10ന് കേസ് വീണ്ടും പരിഗണിക്കും.