ശബരിമല വിഷയത്തില്‍ നിരാഹാര സമരം നടത്തി വരവെ ബിജെപി സംസ്ഥാന ജനറല്‍ സെക്രട്ടറി ശോഭാ സുരേന്ദ്രന്‍ സ്റ്റീല്‍ ക്ലാസില്‍ പാനിയം കുടിച്ചതിന് പിന്നാലെ സമൂഹമാധ്യമങ്ങള്‍ ട്രോള്‍ മഴയായിരുന്നു. നിരാഹാരത്തിന്റെ പത്താം ദിനം ശോഭാ സുരേന്ദ്രനെ ആരോഗ്യ പ്രശ്‌നങ്ങളെ തുടര്‍ന്ന് ആശുപത്രിയിലേക്ക് മാറ്റുക കൂടി ചെയ്തതോടെ ട്രോളര്‍മാര്‍ ദയാരഹിതമായി ബിജെപിയുടെ സംസ്ഥാന ജനറല്‍ സെക്രട്ടറിയെ വധിച്ചു. 

ശോഭാ സുരേന്ദ്രനെ ട്രോളിയവരുടെ കൂട്ടത്തില്‍ മലയാളത്തിന്റെ യുവ സംവിധായകന്‍ മിഥുന്‍ മാനുവേലുമുണ്ട്. സൈലന്റ് ട്രോളായിരുന്നു മിഥുന്റേത്. ശോഭാ സുരേന്ദ്രനെ കുറിച്ചോ, ബിജെപിയെ കുറിച്ചോ ഒരു വാക്ക് പോലും കുറിച്ചില്ല. പകരം തന്റെ സിനിമ ആടിലെ ഒരു സീനിന്റെ വീഡിയോ പോസ്റ്റ് ചെയ്തു. 

നിരാഹാര സമരം നടത്തുന്ന രംഗത്ത് ഷാജി പാപ്പനും ക്ലീറ്റസും തമ്മിലുള്ള സംസാരമാണ് മിഥുന്‍ ഷെയര്‍ ചെയ്തത്. ആ സംഭാഷണം ഇങ്ങനെ, 'അതേ പാപ്പാ ഈ അനിശ്ചിത കാല നിരാഹാരം കിടന്നിട്ട് ആരേലും മരിച്ചിട്ടുണ്ടോ' എന്ന് ക്ലീറ്റസ് ചോദിക്കുന്നതും, ' പിന്നേ കഴിഞ്ഞ വര്‍ഷം ഒരുത്തന്‍ ഫുഡ്‌പോയിസണ്‍ അടിച്ചു ചത്തു എന്ന് ഷാജി പാപ്പന്‍ പറയുന്നതുമാണ് ആ ഭാഗം. സംഭവം ഫേസ്ബുക്കില്‍ എല്ലാവര്‍ക്കും കത്തി കഴിഞ്ഞു.