ദുബൈ: ചെറുകിട ബിസിനസുകളെ സഹായിക്കുന്നതിന് പുതിയ പദ്ധതിയുമായി ദുബൈയിലെ പണമടച്ചുള്ള പൊതു പാർക്കിങ് സേവനദാതാക്കളായ പാർക്കിൻ. സ്പോട്ട്സ് ഫോർ ഷോപ്സ് എന്ന പദ്ധതിയിലൂടെ വാഹനത്തിലെത്തുന്നവർക്ക് പാർക്കിങ്ങിന് നൽകുന്ന ഫീസ് തിരികെ ലഭിക്കുന്ന പദ്ധതിയാണ് പാർക്കിൻ വിഭാവനം ചെയ്തിട്ടുള്ളത്.

ഈ പുതിയ പദ്ധതിയുടെ അടിസ്ഥാനം അറിയപ്പെടാത്ത, എന്നാൽ മികച്ചതും വ്യത്യസ്തവുമായ ചെറുകിട സ്ഥാപനങ്ങളിലേക്ക് ഉപഭോക്താക്കളെ ആകർഷിക്കുക എന്നതാണ്. ഈ പദ്ധതിയിലേക്ക് ചേർന്നിട്ടുള്ള സ്ഥാപനങ്ങളുമായി ചേർന്നാണ് ഈ സംരഭം നടപ്പാക്കുക.

ഈ സംരഭത്തിൽ ചേർന്നിട്ടുള്ള കടകൾക്ക് സമീപമുള്ള പാർക്കിൻ പാർക്കിങ്ങിന് നൽകുന്ന സ്ഥലത്ത് വാഹനം പാർക്ക് ചെയ്യണം. അവിടെ പാർക്കിങ് ഫീസ് നൽകണം. അതിന് ശേഷം നിർദ്ദിഷ്ട കടയിൽ നിന്ന് സാധനം വാങ്ങുമ്പോൾ, വിൽപ്പനക്കാർ, വാങ്ങുന്ന ആളി​ന്റെ മൊബൈൽ നമ്പർ ഉപയോഗിച്ച് പാർക്കിൻ വിവരങ്ങൾ സ്ഥിരീകരിക്കും. സ്ഥിരീകരണം പൂർത്തിയാകുമ്പോൾ പാർക്കിങ് ഫീസിന് അടച്ച തുക തിരികെ ഉപഭോക്താവി​ന്റെ പാർക്കിൻ വാലറ്റിലേക്ക് വരും.

ഈ സംരംഭം മെയ് ആദ്യവാരം പരീക്ഷാണടിസ്ഥാനത്തിൽ നടത്തും. ആദ്യഘട്ടമായി 15 സ്ഥാപനങ്ങളെ ആണ് ഇതിൽ ഉൾപ്പെടുത്തുന്നത്.

കമ്പനിയിൽ നിന്നുള്ള വിവരങ്ങൾ അനുസരിച്ച്, പങ്കെടുക്കുന്ന ചില കമ്പനികളിൽ സൈക്കിൾ 2 സൈക്കിൾ, ബെയ്‌റൂട്ട് ബ്ലെൻഡ്‌സ്, അൽ ഇംബ്രാത്തൂർ, സാൻ ദിയാഗോ കീ കട്ടിങ്, രവി റെസ്റ്റോറന്റ്, സോം വെജിറ്റേറിയൻ, ദമ്യതി പ്ലസ്, ദ് ലോൺഡ്രി ഹബ്, നായിഫ് ബേക്കർ എന്നിവ ഉൾപ്പെടുന്നതായി ഖലീജ് ടൈംസ് റിപ്പോർട്ട് ചെയ്യുന്നു.

പാർക്കിൻ നടപ്പാക്കുന്ന ഈ പദ്ധതിയിൽ പങ്കാളികളാകുന്ന സ്ഥാപനങ്ങളായിരിക്കും ക്യാഷ്ബാക്ക് ആനുകൂല്യങ്ങൾ നൽകേണ്ടത്. പാർക്കിങ് ചെലവ് കുറയ്ക്കാനും പ്രാദേശിക തലത്തിലുള്ള ചെറുകിടകച്ചവടം വർധിപ്പിക്കാനും ഈ പദ്ധതി സഹായിക്കുമെന്നാണ് പ്രതീക്ഷിക്കുന്നത്.

നഗരത്തിന്റെ സാമ്പത്തിക വളർച്ചയിൽ ചെറുകിട ബിസിനസുകൾക്ക് വലിയ പങ്കുണ്ടെന്നും പുതിയ നീക്കം പ്രാദേശിക വ്യാപാരം മെച്ചപ്പെടുത്താൻ സഹായിക്കുമെന്നും പാർക്കിൻ ചീഫ് ഓപറേറ്റിങ് ഓഫിസർ ഒസാമ അൽസാഫി അഭിപ്രായപ്പെട്ടു.