ചെന്നൈ: അവസരോചിതമായി ഇടപെട്ടാല്‍ ചിലപ്പോള്‍ ഒരു ജീവന്‍ തന്നെ രക്ഷപെട്ടേക്കാം. തമിഴ്‌നാട്ടില്‍ ഒരു ഡെലിവെറി ബോയ്‌യുടെ അത്തരത്തിലൊരു ഇടപെടലാണ് സോഷ്യല്‍ മീഡിയയില്‍ കയ്യടി നേടിയത്. ജോലിക്കിടെ തനിക്കുണ്ടായ അനുഭവം പുറംലോകത്തോട് തുറന്നു പറഞ്ഞത് ഡെലിവറി ബോയ് തന്നെയാണ്. രാത്രിയില്‍ എലിവിഷം ഓര്‍ഡര്‍ ചെയ്ത യുവതിയെ ആത്മഹത്യയുടെ വക്കില്‍ നിന്ന് യുവാവ് രക്ഷിക്കുകയായിരുന്നു.

രാത്രി വൈകിയായിരുന്നു യുവതി എലിവിഷം ഓര്‍ഡര്‍ ചെയ്തത്. ആദ്യം ഓര്‍ഡര്‍ എടുക്കണോ എന്ന കാര്യത്തില്‍ ആശയക്കുഴപ്പമുണ്ടായി. വീണ്ടും ആലോചിച്ചപ്പോള്‍ ഓര്‍ഡര്‍ സ്വീകരിക്കാമെന്നും അവിടെ വരെ പോയി നോക്കാമെന്നും യുവാവ് തീരുമാനിച്ചു. അവിടെയെത്തിയപ്പോള്‍ കരഞ്ഞുകൊണ്ട് നില്‍ക്കുന്ന യുവതിയെയായിരുന്നു കണ്ടതെന്നാണ് യുവാവ് വിഡിയോയില്‍ പറയുന്നത്.

അസമയത്ത് എലിവിഷം ഓര്‍ഡര്‍ ചെയ്തതെന്തിനാണെന്നാണ് യുവാവ് യുവതിയോട് ചോദിച്ചത്. എലി ശല്യമുണ്ടെങ്കില്‍ പകല്‍ സമയത്തോ രാത്രിയാകും മുമ്പോ അല്ലെങ്കില്‍ നാളെയോ വാങ്ങിയാല്‍ മതിയായിരുന്നു. ഇത് പറയുമ്പോള്‍ യുവതി കരയുകയായിരുന്നു. ജീവനൊടുക്കാനാണോ തീരുമാനമെന്ന് ചോദിച്ചതായി യുവതി പറയുന്നു. യുവതിയെ ആശ്വസിപ്പിച്ച ശേഷം ഓര്‍ഡര്‍ കാന്‍സല്‍ ചെയ്യിച്ചു. വിഡിയോ സാമൂഹികമാധ്യമം ഏറ്റെടുത്തു. നിരവധി പേര്‍ യുവാവിന്റെ പ്രവൃത്തിയെ അഭിനന്ദിച്ച് അഭിപ്രായം പങ്കിട്ടു.