പറ്റ്‌ന: സ്ത്രീധനത്തിന്റെ പേരില്‍ കുടുംബാംഗങ്ങളെ ആക്രമിച്ച വരനും കുടുംബാംഗങ്ങള്‍ക്കുമെതിരെ നടപടി സ്വീകരിക്കണമെന്ന് ആവശ്യപ്പെട്ട് പൊലീസുകാരോട് യുവതി അപേക്ഷിച്ചത് അഞ്ച് മണിക്കൂര്‍. ബന്ധുക്കളെ വരനും മറ്റ് എട്ടുപേരും ചേര്‍ന്ന് ഇരുമ്പ് വടികൊണ്ട് അടിച്ചതായും യുവതി ആരോപിക്കുന്നു. എട്ടുപേര്‍ക്ക് പരിക്കേറ്റതായും പൊലീസിന്റെ ഭാഗത്തുനിന്ന് യാതൊരു നടപടിയും ഉണ്ടായില്ലെന്നും യുവതി പറയുന്നു.

ബിഹാറിലെ നളന്ദ ജില്ലയിലെ സുരാജ്പൂറിലാണ് കേസിനാസ്പദമായ സംഭവം. മോഹന്‍പ്രസാദ് തന്റെ മകളെ മേവാലാലിന്റെ മകന്‍ ഗോപാല്‍ കുമാറിന്റെ മകനുമായി വിവാഹം ഉറപ്പിച്ചിരുന്നു. നേരത്തെ നിശ്ചയിച്ച പ്രകാരം വിവാഹ ചടങ്ങുകള്‍ നടക്കുകയും ചെയ്തു. 

്അതിനിടെ വരന്റെ വീട്ടുകാര്‍ സത്രീധനത്തുക ആവശ്യപ്പെടുകയായിരുന്നു. പറഞ്ഞുറപ്പിച്ച സ്ത്രീധനം ലഭിച്ചില്ലെന്നായിരുന്നു വരന്റെ വീട്ടുകാരുടെ ആക്ഷേപം. എന്നാല്‍ വരന്റെ വീട്ടുകാര്‍ ആവശ്യപ്പെട്ടതുപോലെ 10 ലക്ഷം രൂപയും അഞ്ച് ലക്ഷം രൂപയുടെ ആഭരണങ്ങള്‍ നല്‍കിയതായി വധുവിന്റെ അച്ഛന്‍ പറഞ്ഞു. എന്നാല്‍ വരന്റെ വീട്ടുകാര്‍ കൂടുതല്‍ പണം ആവശ്യപ്പെട്ടതോടെ ചടങ്ങ് ഇരുകൂട്ടരും തമ്മിലുള്ള കലഹമായി മാറി.

തുടര്‍ന്ന് വധുവിന്റെ കുടുംബാംഗങ്ങള്‍ പൊലീസ് സ്റ്റേഷനിലെത്തി പരാതി നല്‍കുകയായിരുന്നു. വരനും കുടുംബത്തിനുമെതിരെ കേസ് എടുക്കണമെന്നായിരുന്നു യുവതിയുടെ ആവശ്യം. എന്നാല്‍ മണിക്കൂറുകള്‍ നിന്നതിന് ശേഷമാണ് വരനും കുടുംബത്തിനുമെതിരെ കേസ് എടുക്കാന്‍ പൊലീസ് തയ്യാറായത്. എന്നാല്‍ സംഭവവുമായി ബന്ധപ്പെട്ട് ഇതുവരെ തുടര്‍നടപടികള്‍ ഉണ്ടായിട്ടില്ലെന്നും യുവതി ആരോപിക്കുന്നു.