ന്യൂഡൽഹി: കോൺഗ്രസ് പ്രവർത്തക സമിതി യോഗം ഈ മാസം 16ന് ചേരും. രാജ്യത്തെ നിലവിലെ രാഷ്ട്രീയ സാഹചര്യം, പുതിയ പാർട്ടി അധ്യക്ഷനെ തീരുമാനിക്കൽ, വിവിധ സംസ്ഥാനങ്ങളിൽ വരാനിരിക്കുന്ന നിയമസഭാ തെരഞ്ഞെടുപ്പുകൾ, പഞ്ചാബിലെ പാർട്ടിയിലുണ്ടായ പ്രതിസന്ധികൾ തുടങ്ങിയ വിവിധ വിഷയങ്ങൾ യോഗത്തിൽ ചർച്ചയാകും. കപിൽ സിബൽ ഉൾപ്പടെയുള്ള ജി23 നേതാക്കൾ ഉയർത്തിയ വിമർശനങ്ങളും യോഗത്തിൽ ചർച്ചകൾക്ക് വിധേയമാകും.

അടുത്ത വർഷം നിയസഭാ തെരഞ്ഞെടുപ്പുകൾ നടക്കുന്ന പഞ്ചാബ് ഉൾപ്പടെയുള്ള സംസ്ഥാനങ്ങളിൽ പാർട്ടി പല തരത്തിലുള്ള സംഘടന പ്രതിസന്ധികൾ നേരിടുന്നുണ്ട്. തെരഞ്ഞെടുപ്പ് പടിവാതിലിൽ എത്തിയ അവസരത്തിൽ ഉയർന്ന പഞ്ചാബിലെ പ്രശ്‌നങ്ങൾ പരിഹരിക്കാൻ സാധിക്കാത്തത് കോൺഗ്രസ് നേതൃത്വത്തിന് വലിയ വെല്ലുവിളിയാണ്. 

അതിനിടെ ലഖിംപുർ ഖേരിയിൽ കർഷകർ കൊല്ലപ്പെട്ട സംഭവത്തിൽ പ്രിയങ്കയും രാഹുലും നടത്തിയ പ്രവർത്തനങ്ങൾ ഉത്തർപ്രേദേശിൽ പാർട്ടിക്ക് ഉണർവ് നൽകിയിട്ടുണ്ടെന്ന വിലയിരുത്തലാണ് നേതൃത്വത്തിനുള്ളത്. വിഷയത്തിൽ നടത്തേണ്ട തുടർ സമരങ്ങളും യോഗത്തിൽ ചർച്ചാ വിഷയമാകും.