ഹരിദ്വാര്‍: കുംഭമേളയില്‍ പങ്കെടുത്ത സന്യാസി കോവിഡ് ബാധിച്ച് മരിച്ചു. മധ്യപ്രദേശിലെ നിര്‍വാനി അഖാഡ തലവന്‍ മഹാമണ്ഡലേശ്വര്‍ കപില്‍ദേവ് ദാസാണ് കോവിഡ് ബാധിച്ച് മരിച്ചത്. കുംഭമേളയ്ക്ക് നേതൃത്വം നല്‍കുന്ന അഖാഡകളില്‍ ഒന്നിന്റെ തലവനാണ് മഹാമണ്ഡലേശ്വര്‍ കപില്‍ദേവ് ദാസ്. 

കുംഭമേളയില്‍ പങ്കെടുത്ത നിരവധി  സന്യാസിമാര്‍ക്ക് കൂടി കോവിഡ് സ്ഥിരീകരിച്ചിരുന്നു. സന്യാസിമാര്‍ക്കിടയില്‍ ആര്‍ടിപിസിആര്‍ പരിശോധന നടക്കുകയാണ്. നാളെ മുതല്‍ പരിശോധന കൂടുതല്‍ വേഗത്തിലാക്കുമെന്ന് ഹരിദ്വാര്‍ ചീഫ് മെഡിക്കല്‍ ഓഫീസര്‍ ഡോ. എസ് കെ ഝാ അറിയിച്ചു. കഴിഞ്ഞ നാലുദിവസത്തിനിടെ ഹരിദ്വാറില്‍ മാത്രം 1701 പേര്‍ക്കാണ് കോവിഡ് സ്ഥിരീകരിച്ചത്.

കുംഭമേള നടക്കുന്ന ഉത്തരാഖണ്ഡില്‍ സൂപ്പര്‍ സ്‌പ്രെഡിനുള്ള സാധ്യത നിലനില്‍ക്കുന്ന പശ്ചാത്തലത്തില്‍ ചടങ്ങുകള്‍ വെട്ടിച്ചുരുക്കിയേക്കുമെന്ന് റിപ്പോര്‍ട്ടുണ്ട്. അതിനിടെ, കുംഭമേളയില്‍ നിന്ന് പിന്മാറുന്നതായി 13 അഖാഡകളില്‍ ഒന്നായ നിരഞ്ജനി അറിയിച്ചു. ഹരിദ്വാറിലെ കോവിഡ് വ്യാപനത്തിന്റെ സ്ഥിതിയും തീര്‍ത്ഥാടകരില്‍ പലര്‍ക്കും രോഗം സ്ഥീരീകരിക്കുകയും ചെയ്ത സാഹചര്യവും കണക്കിലെടുത്ത് കുംഭമേള അവസാനിപ്പിക്കുകയാണെന്ന് നിരഞ്ജനി അഖാഢ സെക്രട്ടറി രവീന്ദ്ര പുരി മഹാരാജ് പറഞ്ഞു.

ഇക്കാര്യത്തില്‍ അന്തിമ തീരുമാനം അഖാഢ പരിഷത്താണ് എടുക്കേണ്ടതെന്നും അതിനായി അഭ്യര്‍ത്ഥിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു. നേരത്തെ ഈ മാസം 30 വരെയാണ് കുംഭമേള നടത്താന്‍ നിശ്ചയിച്ചിരുന്നത്. നേരത്തെ കുംഭമേളയില്‍ പങ്കെടുക്കുന്നവര്‍ മാസ്‌ക് ധരിക്കാത്തതും സാമൂഹിക അകലം പാലിക്കാതെയും ചടങ്ങുകളില്‍ പങ്കെടുക്കുന്നത് വന്‍ വിമര്‍ശനത്തിന് ഇടയാക്കിയിരുന്നു.