മം​ഗളൂരു: അവശ നിലയിലായ രോഗിയുമായി പോയ ആംബുലൻസിന് തടസമുണ്ടാക്കി വാഹനമോടിച്ച സംഭവത്തിൽ യുവാവ് അറസ്റ്റിൽ. കഴിഞ്ഞ ദിവസം മംഗളൂരു ദേശീയപാത 66ൽ നേത്രാവതി പാലത്തിനും പമ്പുവെല്ലിനും ഇടയിലാണ് സംഭവം. 

രോഗിയെ മംഗളൂരുവിലെ ആശുപത്രിയിലേക്ക് കൊണ്ടുപോകുകയായിരുന്നു ആംബുലൻസ്. ഉള്ളാൾ സോമേശ്വര സ്വദേശി ചരൻ ആണ് ആംബുലൻസിന് തടസമുണ്ടാക്കി കാറോടിച്ചത്. പല തവണ ഹോണും സൈറണും മുഴക്കിയിട്ടും ഇയാൾ വഴി കൊടുക്കാൻ തയാറായില്ലെന്ന് ആംബുലൻസ് ഡ്രൈവർ പറയുന്നു.

മുന്നിലുള്ള എർട്ടി​ഗ കാർ വഴി തടസപ്പെടുത്തുന്നതിന്റെ വീഡിയോ ആംബുലൻസിനകത്ത് ഉള്ളവർ തന്നെ ചിത്രീകരിച്ച് പൊലീസിന് അയച്ചു. ഇതോടെ മംഗളൂരു ദക്ഷിണ ട്രാഫിക് പൊലീസ് പ്രശ്നത്തിൽ ഇടപെട്ട് യുവാവിനെ അറസ്റ്റ് ചെയ്യുകയായിരുന്നു.