ന്യൂഡൽഹി: കർഷകസമരം ഫലംകാണാതെ മാസങ്ങളായി മുന്നോട്ടുപോകുന്ന സാഹചര്യത്തിൽ പ്രധാനമന്ത്രി മോദിയുടെ അമ്മയ്ക്ക് വികാരനിർഭരമായ കത്തെഴുതി പഞ്ചാബ് കർഷകൻ. കർഷകരെ രക്ഷിക്കണമെന്നാവശ്യപ്പെട്ടിരിക്കുന്ന കത്തിൽ അമ്മ ആവശ്യപ്പെട്ടാൽ മകനായ പ്രധാനമന്ത്രി അനുസരിക്കുമെന്നാണ് പറയുന്നത്. ഫിറോസ്പൂരിലെ ഹർപ്രീത് സിംഗ് എന്ന കർഷകനാണ് മോദിയുടെ അമ്മ ഹീരാബെൻ മോദിക്ക് കത്തെഴുതിയത്. 

അമ്മയെ ദൈവം പോലെ കരുതുന്ന ഒരിന്ത്യക്കാരന് അമ്മയുടെ അപേക്ഷ തള്ളിക്കളയാനാവില്ലെന്ന് ഹർപ്രീത് സംഗ് കത്തിൽ പറയുന്നു.‘അതീവ ദുഃഖത്തോടെയാണ് ഞാൻ ഈ കത്തെഴുതുന്നത്. കാർഷിക ഭേദഗതി നിയമം പിൻവലിക്കുന്നതിനായി രാജ്യത്തെ അന്നദാതാക്കളായ കർഷകർ കഠിനമായ കാലാവസ്ഥയിലും തെരുവിൽ ഉറങ്ങുന്നത് താങ്കളും കാണുന്നുണ്ടാവും. പ്രക്ഷോഭകരിൽ 90-95 വയസുള്ളവർ വരെയുണ്ട്. അവരെ കൂടാതെ കുട്ടികളും സ്ത്രീകളുമുണ്ട്. കഠിനമായ തണുപ്പ് പ്രക്ഷോഭകരെ രോഗികളാക്കുകയാണ്. അവരുടെ ജീവൻ നഷ്ടപ്പെടുന്നത് നമുക്കെല്ലാം ആശങ്കയുണ്ടാക്കുന്നതാണ്’ കത്തിൽ പറയുന്നു.

കർഷകർക്ക് അനുകൂലമായി സമരം ചെയ്യുമ്പോൾ ഹർപ്രീതിനെയും സംഘത്തെയും പൊലീസ് അറസ്റ്റ് ചെയ്തിരുന്നു. "ഇന്ത്യൻ പ്രധാനമന്ത്രിക്ക് കർഷകരെ അവഗണിക്കാനായേക്കും എന്നാൽ, അമ്മ പറഞ്ഞാൽ അനുസരിക്കാതിരിക്കുമോ? താങ്കളുടെ മകനായ ഇന്ത്യൻ പ്രധാനമന്ത്രി കർഷക വിരുദ്ധനിയമം പിൻവലിക്കുമെന്ന പ്രതീക്ഷയിലാണ് ഇതെഴുതുന്നത്. അമ്മയോട് പ്രധാനമന്ത്രിക്ക് ‘നോ’ പറയാനാവില്ല", ഹർപ്രീത് കത്തിൽ കുറിച്ചത് ഇങ്ങനെ.