ന്യൂഡല്‍ഹി: രാജ്യത്തിന്റെ വിവിധ ഭാഗങ്ങളില്‍ വ്യത്യസ്ത വേഗതയിലാണ് ഇത്തവണ തെക്കുപടിഞ്ഞാറന്‍ കാലവര്‍ഷം എത്തുന്നത്. കേരളത്തില്‍ സാധാരണയേക്കാള്‍ കാലതാമസത്തോടെ എത്തിയ കാലവര്‍ഷം പിന്നീട് വേഗം കൂട്ടിയെങ്കിലും ചില മേഖലകളില്‍ ഇപ്പോഴും പുരോഗതി മന്ദഗതിയിലാണ്.

അതേസമയം മഹാരാഷ്ട്രയിലേക്കുള്ള കാലവര്‍ഷത്തിന്റെ കടന്നുവരവ് പ്രതീക്ഷിച്ചതിനേക്കാള്‍ നേരത്തേ ആയിരുന്നു. ഈ സാഹചര്യത്തില്‍ തലസ്ഥാനമായ ഡല്‍ഹിയിലേക്ക് എത്താന്‍ കാലവര്‍ഷം സമയക്രമം പാലിക്കുമോയെന്നതാണ് കാലാവസ്ഥാ നിരീക്ഷകരുടെ പ്രധാന ചര്‍ച്ചാ വിഷയം.

ഇന്ത്യന്‍ കാലാവസ്ഥാ വകുപ്പ് (IMD) പുറത്തുവിട്ട പുതിയ വിലയിരുത്തല്‍ പ്രകാരം, നിലവിലെ സാഹചര്യങ്ങള്‍ അനുകൂലമായതിനാല്‍ ഡല്‍ഹിയില്‍ കാലവര്‍ഷം സാധാരണ സമയത്ത് അല്ലെങ്കില്‍ അതിനോട് അടുത്ത ദിവസങ്ങളില്‍ തന്നെ എത്തിച്ചേരാനാണ് സാധ്യത്. സാധാരണ ജൂണ്‍ 27 നോട് അടുത്ത ദിവസങ്ങളിലാണ് തെക്കുപടിഞ്ഞാറന്‍ കാലവര്‍ഷം ഡല്‍ഹിയിലെത്തുന്നത്. എന്നാല്‍ കഴിഞ്ഞ ഏതാനും വര്‍ഷങ്ങളായി കാലവര്‍ഷത്തിന്റെ വരവില്‍ വലിയ വ്യത്യാസങ്ങള്‍ രേഖപ്പെടുത്തിയിരുന്നു.

ഈ വര്‍ഷം മെയ് അവസാനത്തോടെയാണ് കാലവര്‍ഷം കേരള തീരത്തെത്തിയത്. എന്നാല്‍ കര്‍ണാടക, ഗോവ, മഹാരാഷ്ട്ര എന്നിവിടങ്ങളിലേക്ക് അതിവേഗം വ്യാപിച്ചു. മുംബൈ ഉള്‍പ്പെടെയുള്ള പല പ്രദേശങ്ങളിലും കനത്ത മഴ ലഭിക്കുകയും ചെയ്തു. എന്നാല്‍ വടക്കുപടിഞ്ഞാറന്‍ മേഖലകളില്‍ അന്തരീക്ഷ സാഹചര്യങ്ങളിലെ മാറ്റം മണ്‍സൂണ്‍ വൈകിപ്പിക്കുന്നതായാണ് റിപ്പോര്‍ട്ട്.

കാലവര്‍ഷത്തിന്റെ കടന്നുവരവിനെ സ്വാധീനിക്കുന്ന പ്രധാന ഘടകങ്ങള്‍ അറബിക്കടലിലെയും ബംഗാള്‍ ഉള്‍ക്കടലിലെയും കാറ്റിന്റെ ശക്തിയും ഈര്‍പ്പത്തിന്റെ ലഭ്യതയുമാണ്. നിലവില്‍ ബംഗാള്‍ ഉള്‍ക്കടലില്‍ രൂപപ്പെട്ട കാലാവസ്ഥാ സംവിധാനങ്ങള്‍ മഴമേഘങ്ങളുടെ വ്യാപനത്തെ സഹായിക്കുന്നതിനാല്‍ വടക്കേ ഇന്ത്യയിലേക്കുള്ള കാലവര്‍ഷത്തിന്റെ യാത്ര കൂടുതല്‍ സുഗമമാകുമെന്നാണ് കാലാവസ്ഥാ വിദഗ്ധര്‍ പ്രതീക്ഷിക്കുന്നത്.

ഡല്‍ഹിയിലും സമീപ പ്രദേശങ്ങളിലുമായി കഴിഞ്ഞ ദിവസങ്ങളില്‍ ഉയര്‍ന്ന താപനിലയും ഉഷ്ണക്കാറ്റും അനുഭവപ്പെട്ടിരുന്നു. കാലവര്‍ഷം എത്തുന്നതോടെ ചൂടിന് ആശ്വാസം ലഭിക്കുമെന്നാണ് പ്രതീക്ഷ. അതേസമയം, ശക്തമായ മഴയും കാറ്റും നഗരപ്രദേശങ്ങളില്‍ വെള്ളക്കെട്ടിനും ഗതാഗത തടസ്സങ്ങള്‍ക്കും കാരണമാകാനും സാധ്യതയുണ്ടെന്ന് അധികൃതര്‍ മുന്നറിയിപ്പു നല്‍കുന്നു.