മുംബൈ: മഹാരാഷ്ട്ര നിയമസഭ തെരഞ്ഞെടുപ്പില്‍ വോട്ടു ക്രമക്കേട് നടന്നുവെന്ന ആരോപണം പിന്‍വലിച്ച് മാപ്പു പറഞ്ഞ് തെരഞ്ഞെടുപ്പ് വിശകലന വിദഗ്ധന്‍ സഞ്ജയ് കുമാര്‍. തന്റെ ടീം രേഖകള്‍ തെറ്റായി വിശകലനം ചെയ്തതു കൊണ്ടുണ്ടായ പിഴവാണ് സംഭവിച്ചത്. തെറ്റായ വിവരങ്ങള്‍ പ്രചരിപ്പിക്കാന്‍ തനിക്ക് ഒരു ഉദ്ദേശ്യവും ഉണ്ടായിരുന്നില്ലെന്നും, പഴയ ട്വീറ്റ് നീക്കം ചെയ്തതായും സഞ്ജയ് കുമാര്‍ വ്യക്തമാക്കി.

ലോക്‌നീതി-സിഎസ്ഡിഎസുമായി സഹകരിച്ച് പ്രവര്‍ത്തിക്കുന്ന തെരഞ്ഞെടുപ്പ് വിശകലനവിദഗ്ധനാണ് സഞ്ജയ് കുമാര്‍. മഹാരാഷ്ട്ര നിയമസഭ തെരഞ്ഞെടുപ്പില്‍ വോട്ടു ക്രമക്കേട് നടന്നു. തൊട്ടു മുമ്പു നടന്ന ലോക്‌സഭ തെരഞ്ഞെടുപ്പിനെ അപേക്ഷിച്ച്, നിയമസഭ തെരഞ്ഞെടുപ്പില്‍ രണ്ട് നിയമസഭ മണ്ഡലങ്ങളില്‍ ഗണ്യമായ തോതില്‍ വോട്ടര്‍മാരുടെ എണ്ണത്തില്‍ കുറവുണ്ടായെന്നാണ് സഞ്ജയ് കുമാര്‍ വ്യക്തമാക്കിയിരുന്നത്.

എന്നാല്‍ സഞ്ജയ് കുമാറിന്റെ ട്വീറ്റിനെതിരെ ബിജെപി രൂക്ഷ വിമര്‍ശനം ഉയര്‍ത്തിയിരുന്നു. സഞ്ജയ് കുമാറിന്റെ ക്ഷമാപണം, സത്യസന്ധമായ ഒരു പിഴവാണെന്ന് കരുതാനാവില്ലെന്ന് ബിജെപി പ്രതികരിച്ചു. സഞ്ജയ് കുമാര്‍ ഇപ്പോള്‍ ക്ഷമാപണം നടത്തിയിട്ടുണ്ട്. യോഗേന്ദ്ര യാദവിന്റെ ഈ ശിഷ്യന്‍ എപ്പോഴാണ് എന്തെങ്കിലും ശരിയായത് ചെയ്തത്? ഓരോ തെരഞ്ഞെടുപ്പിനു മുമ്പും ബിജെപി തോല്‍ക്കുമെന്ന് അദ്ദേഹം പ്രവചിക്കുന്നു. തിരിച്ച് സംഭവിച്ചാല്‍ എങ്ങനെ ബിജെപി വിജയിച്ചു എന്നതിന് ന്യായീകരണവുമായി പ്രത്യക്ഷപ്പെടും. ടിവി പ്രേക്ഷകര്‍ വിഡ്ഢികളാണെന്ന് അദ്ദേഹം കരുതുന്നുണ്ടാകണം. ബിജെപി ഐടി മേധാവി അമിത് മാളവ്യ അഭിപ്രായപ്പെട്ടു.