ജമ്മു: അതിര്‍ത്തിയില്‍ ഇന്ത്യന്‍ സൈന്യം നടത്തിയ തിരിച്ചടിയില്‍ രണ്ടു പാകിസ്ഥാന്‍ പട്ടാളക്കാര്‍ മരിച്ചു. പാക് സൈന്യം കഴിഞ്ഞ ദിവസം നടത്തിയ പ്രകോപനമില്ലാത്ത ആക്രമണത്തിനു തിരിച്ചടിയാണ് ഇന്ത്യന്‍ സേനയുടെ ഭാഗത്തുനിന്നുണ്ടായത് എന്നാണ് റിപ്പോര്‍ട്ടുകള്‍. പാക് അതിര്‍ത്തിക്കപ്പുറം കടന്നാണ് ഇന്ത്യ ആക്രണം നടത്തിയെന്ന് റിപ്പോര്‍ട്ടുകളില്‍ പറയുന്നു.

ജമ്മു മേഖലയിലെ താഘ്ധറിലാണ് ഇന്ത്യന്‍ സേന ആക്രമണം നടത്തിയത്. ആക്രമണത്തില്‍ രണ്ടു പാക് പട്ടാളക്കാര്‍ മരിച്ചതായി സേനാ വക്താവ് സ്ഥിരീകരിച്ചു. നുഴഞ്ഞുകയറ്റക്കാര്‍ക്കു സൗകര്യമൊരുക്കാന്‍ പാക് സേന കഴിഞ്ഞ ദിവസം പ്രകോപനമില്ലാതെ ഇന്ത്യന്‍ സൈന്യത്തിനു നേരെ ആക്രമണം നടത്തുകയായിരുന്നെന്ന് വക്താവ് പറഞ്ഞു.

വെടിനിര്‍ത്തല്‍ ധാരണ ലംഘിച്ച് പാകിസ്ഥാന്‍ സൈന്യം നടത്തിയ ആക്രമണത്തില്‍ കഴിഞ്ഞ ദിവസം ഒരു ഇന്ത്യന്‍ ജവാന്‍ മരിച്ചിരുന്നു. ഇതിനു തിരിച്ചടിയായാണ് ഇന്ത്യന്‍ സൈനയുടെ നടപടി. 

പാകിസ്ഥാന്‍ സ്വാതന്ത്ര്യദിന ആഘോഷം നടക്കുന്നതിന്റെ തൊട്ടു മുമ്പായാണ് അതിര്‍ത്തിയില്‍ ഇന്ത്യയുടെ തിരിച്ചടിയുണ്ടായത്.