ചെന്നൈ: കോവിഡ് ദുരിതാശ്വാസത്തിന് താരങ്ങൾ നൽകുന്ന സഹായ ധനത്തെ കുറിച്ച് ആരാധകർ തമ്മിലുണ്ടായ തർക്കം കലാശിച്ചത് കൊലപാതകത്തിൽ. ചെന്നൈയിലെ മാരക്കാണത്താണ് ദാരുണ സംഭവം അരങ്ങേറിയത്. രജനികാന്ത് ആരാധകൻ വിജയ് ആരാധകനായ യുവാവിനെയാണ് കൊലപ്പെടുത്തിയത്. 

വിജയ് ആരാധകനായ 22 വയസുള്ള യുവരാജ് എന്ന യുവാവാണ് കൊല്ലപ്പെട്ടത്. സംഭവത്തിൽ ഇയാളുടെ അയൽവാസിയും രജനികാന്ത് ആരാധകനുമായ ദിനേശ് ബാബുവിനെ പൊലീസ് അറസ്റ്റ് ചെയ്തു.  

കോവിഡ് ദുരിതാശ്വാസത്തിന് ഏറ്റവും കൂടുതൽ പണം നൽകിയത് വിജയ് ആണെന്നായിരുന്നു യുവരാജ് വാദിച്ചത്. എന്നാൽ ഇത് ദിനേശ് നിഷേധിച്ചു. പിന്നീട് ഇരുവരും തമ്മിൽ തർക്കമായി. തർക്കത്തിനൊടുവിൽ യുവരാജിനെ ദിനേശ് ബാബു കൊലപ്പെടുത്തുകയായിരുന്നു. 

കൊറോണ പ്രതിരോധ പോരാട്ടത്തിന് നടൻ വിജയ് ഒരു കോടി 30 ലക്ഷം രൂപയാണ് സംഭാവന നൽകിയത്. കേരളത്തിന് 10 ലക്ഷം രൂപയും താരം നൽകി. രജനികാന്ത് 50 ലക്ഷം രൂപയാണ് ആദ്യം കോവിഡ് ദുരിതാശ്വാസത്തിന് നൽകിയത്.