മുംബൈ: കോവിഡിനെതിരെ പോരാടുന്ന ആരോഗ്യ പ്രവർത്തകർക്ക് ഊർജം പകരാൻ നഴ്സിന്റെ വേഷത്തിൽ ആശുപത്രിയിലെത്തി മേയർ. മുംബൈ മേയർ കിഷോരി പേഡ്നേകറാണ് വേറിട്ട രീതിയിൽ ആശുപത്രിയിലെത്തി ശ്രദ്ധേയയായത്.

നഴ്സ് കൂടിയായ കിഷോരി ബിവൈഎൽ നായർ ആശുപത്രിയിൽ തിങ്കളാഴ്ച രാവിലെ എത്തിയത്. ആശുപത്രിയിലെത്തിയ മേയർ ആരോഗ്യ പ്രവർത്തകർ എന്തെങ്കിലും ബുദ്ധിമുട്ടുകൾ നേരിടുന്നുണ്ടോ എന്ന് ആരാഞ്ഞു. ആശുപത്രിയിലെ സ്ഥിതിഗതികളും അവർ നേരിട്ടെത്തി വിലയിരുത്തി.

ഞാൻ ഒരു നഴ്സായിരുന്നു. ഈ ജോലിയിലെ പ്രശ്നങ്ങൾ എന്തൊക്കെയാണെന്ന് എനിക്കറിയാം. ഞാനും അവരിൽ ഒരാളാണെന്ന് പറയാനാണ് ഞാൻ നഴ്സിന്റെ യൂണിഫോം ധരിച്ചത്. ഇത് ദുരിത കാലമാണ്. നമ്മളെല്ലാം ഒന്നിച്ചു നിൽക്കേണ്ട സമയമാണ്. കോവിഡിനെതിരെ പോരാടുന്നവർക്ക് പിന്തുണ അറിയിക്കാൻ കൂടിയാണ് താൻ ആശുപത്രിയിലെത്തിയതെന്നും അവർ വ്യക്തമാക്കി.

രണ്ടാഴ്ച മുൻപ് മേയറുമായി സമ്പർക്കത്തിലുണ്ടായിരുന്ന ഒരു മാധ്യമ പ്രവർത്തകന് കോവിഡ് സ്ഥിരീകരിച്ചതിനു പിന്നാലെ മേയർ സ്വയം നിരീക്ഷണത്തിൽ കഴിഞ്ഞിരുന്നു. നിരീക്ഷണ കാലാവധി പൂർത്തിയായതിനു ശേഷം മുംബൈയിലെ കോവിഡ് പ്രതിരോധ പ്രവർത്തനങ്ങളിൽ സജീവ സന്നിധ്യമായി അവരുണ്ട്.