ബംഗലൂരു: അഞ്ചുവയസുകാരി ബൈക്ക് ഓടിച്ചുപോകുന്ന സാഹസിക രംഗങ്ങള്‍ സിനിമകളില്‍ കണ്ടിട്ടുണ്ട്. എന്നാല്‍ യഥാര്‍ത്ഥ ജീവിതത്തില്‍ ഇത്തരം സംഭവങ്ങള്‍ ഒറ്റപ്പെട്ടതാണ്. അത്തരം ഒരു സംഭവം ഐടി തലസ്ഥാനമായ ബംഗലൂരുവില്‍ അരങ്ങേറിയിരിക്കുകയാണ്.സംഭവം യാദൃശ്ചികമാണെന്ന് മാത്രം.

ബംഗലൂരു തുമുക്കുരു റോഡിലാണ് വാഹനയാത്രക്കാരെ ഒരു നിമിഷം സ്തബ്ധരാക്കി നിര്‍ത്തിയ സംഭവം ഉണ്ടായത്. ഒരു വാഹനാപകടവും തുടര്‍ന്ന് നടന്ന സംഭവങ്ങളും ദൃക്‌സാക്ഷികള്‍ ഒരിക്കലും മറക്കാന്‍ ഇടയില്ല. അഞ്ചുവയസുകാരിയായ മകളും ദമ്പതികളും സഞ്ചരിച്ചിരുന്ന ബൈക്ക് മറ്റൊരു ബൈക്കുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തില്‍ ദമ്പതികള്‍ റോഡിലേക്ക് തെറിച്ചുവീണു. ഭര്‍ത്താവ് അതിവേഗത്തില്‍ ഒാടിച്ചിരുന്ന ബൈക്ക് മറ്റൊരു ബൈക്കില്‍ ഇടിക്കുന്നത് ദൃശ്യങ്ങളില്‍ വ്യക്തമാണ്. 

ബൈക്കിന്റെ മുന്‍പില്‍ ഇന്ധനടാങ്കില്‍ ഇരുന്നിരുന്ന പെണ്‍കുട്ടി ബൈക്കുമായി 500 മീറ്റര്‍ സഞ്ചരിച്ചു. തുടര്‍ന്ന് തലനാരിഴയ്ക്ക് അഞ്ചുവയസുകാരി രക്ഷപ്പെട്ടുവെന്നാണ് റിപ്പോര്‍ട്ടുകള്‍. കുറച്ച് ദൂരം പെണ്‍കുട്ടിയുമായി സഞ്ചരിച്ച ബൈക്ക് മീഡിയനില്‍ ഇടിച്ച് നില്‍ക്കുകയായിരുന്നു. ഇടിയുടെ ആഘാതത്തില്‍ മീഡിയനില്‍ പുല്ലുവളര്‍ത്തിയിരുന്ന ഭാഗത്തേയ്ക്കാണ്് കുട്ടി തെറിച്ചുവീണത്. ഇതിനിടെ അതുവഴി കടന്നുവന്ന ലോറിയില്‍ ബൈക്ക് ഇടിയ്ക്കാതിരുന്നത് കുട്ടിയ്ക്ക് രക്ഷയായി. പരിക്കേറ്റ ദമ്പതികളെയും കുട്ടിയെയും ആശുപത്രിയില്‍ പ്രവേശിപ്പിച്ചു.