ചെന്നൈ : പെരിയോർ രാമസ്വാമിയെ അപമാനിച്ചു എന്നാരോപിച്ച് മെ​ഗാസ്റ്റാർ രജനികാന്തിനെതിരെ പൊലീസിൽ  പരാതി. പൊതുവേദിയിൽ നടത്തിയ പ്രസംഗത്തിൽ ദ്രാവിഡ രാഷ്ട്രീയാചാര്യൻ പെരിയോർ ഇ വി രാമസാമിയെ അപമാനിച്ചു എന്നാരോപിച്ച്  ദ്രാവിഡ വിടുതലൈ കഴകം പ്രവർത്തകരാണ് കോയമ്പത്തൂർ  പൊലീസിൽ പരാതി നൽകിയത്.

നടൻ മതസ്പർധ വളർത്താൻ ശ്രമിച്ചുവെന്നും സംഘടനയുടെ അധ്യക്ഷൻ നെഹ്റു ദാസ് പരാതിയിൽ ആരോപിക്കുന്നു. പെരിയോറിനെതിരായ പ്രസ്താവനയിൽ രജനീകാന്ത് മാപ്പു പറയണം. അതിനു തയ്യാറായില്ലെങ്കിൽ ശക്തമായ പ്രതിഷേധം നേരിടേണ്ടിവരുമെന്ന് സംഘടനാ പ്രവർത്തകർ പറഞ്ഞു. കഴിഞ്ഞയാഴ്ച ചെന്നൈയിൽ തമിഴ് മാസിക തുഗ്ലക്കിന്റെ 50-ാം വാർഷികാഘോഷത്തിൽ സംസാരിക്കവേയായിരുന്നു വിവാദ പരാമർശം.

1971-ൽ സേലത്ത് അന്ധവിശ്വാസത്തിനെതിരെ പെരിയാറിന്റെ നേതൃത്വത്തിൽ നടന്ന റാലിയിൽ രാമന്റെയും സീതയുടെയും നഗ്ന ചിത്രങ്ങൾ പ്രദർശിപ്പിച്ചുവെന്നായിരുന്നു രജനിയുടെ പരാമർശം. ഇതു കല്ലുവച്ച നുണയാണെന്നാണ് ദ്രാവിഡ കഴകം നേതാക്കൾ പരാതിയിൽ പറയുന്നു.