ന്യൂഡല്‍ഹി : അവധി ആഘോഷിക്കാനായി പ്ലസ് ടു വിദ്യാര്‍ത്ഥികള്‍ പോയ കാര്‍ കനാലിലേക്ക് മറിഞ്ഞ് നാലുപേരെ കാണാതായി. ഗാസിയാബാദിലാണ് സംഭവം. ഉത്തര്‍പ്രദേശിലെ അപ്പര്‍ ഗംഗാ കനാലിലേക്കാണ് എസ് യു വി കാര്‍ മറിഞ്ഞത്.

മുസഫര്‍നഗറിലെ സ്‌കൂളിലെ ആറ് പ്ലസ് ടു വിദ്യാര്‍ത്ഥികളാണ് മഥുരയില്‍ അവധി ആഘോഷിക്കാനായി പുറപ്പെട്ടത്. ഇതില്‍ രണ്ടുപേര്‍ പെണ്‍കുട്ടികളാണ്. അമിത വേഗതയില്‍ പോയ കാര്‍ പുലര്‍ച്ചെയോടെ നിയന്ത്രണം വിട്ട് ഡിവൈഡറില്‍ ഇടിച്ച് കനാലിലേക്ക് മറിയുകയായിരുന്നു.

കാര്‍ കനാലിലേക്ക് പതിച്ചതോടെ നീന്തല്‍ അറിയാവുന്ന രണ്ടുപേര്‍ നീന്തി രക്ഷപ്പെട്ടു. ബാക്കിയുള്ളവരെ കാണാതാകുകയായിരുന്നു. ഇവരെ കണ്ടെത്താനുള്ള രക്ഷാപ്രവര്‍ത്തനങ്ങള്‍ പുരോഗമിക്കുകയാണെന്ന് ഗാസിയാബാദ് എസ്പി നീരജ് കുമാര്‍ ജാദ്വാന്‍ പറഞ്ഞു.