ലക്നോ: തെരഞ്ഞെടുപ്പ് പെരുമാറ്റച്ചട്ടം ലംഘിച്ചെന്ന പരാതിയുടെ അടിസ്ഥാനത്തിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥിന് തെരഞ്ഞെടുപ്പ് കമ്മീഷന്റെ നോട്ടീസ്. ബാ​ബ​റി​ന്‍റെ പി​ന്‍​ഗാ​മി (ബാ​ബ​ര്‍ കി ​ഔ​ലാ​ദ്) പ്രസ്താവനയിലാണ് തെരഞ്ഞെടുപ്പ് കമ്മീഷന്‍ യോഗിക്ക് നോട്ടീസ് അയച്ചത്. 24 മണിക്കൂറിനുളളില്‍ മറുപടി നല്‍കാനാണ് കമ്മീഷന്‍റെ നിർദ്ദേശം. 

ഏപ്രിൽ 19-ാം തിയതി ഉത്തര്‍പ്രദേശിലെ സാംബലില്‍ നടത്തിയ പ്രസംഗമാണ് വിവാദമായത്. സാംബലില്‍ നടന്ന തെരഞ്ഞെടുപ്പ് റാലിയില്‍ പ്രസംഗിക്കുമ്പോഴാണ് മണ്ഡലത്തിലെ എസ്പി സ്ഥാനാര്‍ഥിയെ ഉദ്ദേശിച്ചുള്ള യോ​ഗിയുടെ പരാമർശം. വര്‍ഗീയ പരാമര്‍ശത്തിൽ തെരഞ്ഞെടുപ്പ് കമ്മീഷന്‍റെ 72 മണിക്കൂര്‍ വിലക്ക് അവസാനിച്ചതിന് പിന്നാലെയാണ് യോഗി ആദിത്യനാഥ് വീണ്ടും വിവാദ പ്രസ്താവനയുമായി രംഗത്തെത്തിയത്.