കൊല്‍ക്കത്ത: ഭക്ഷണ വിതരണ ശൃംഖലയായ സൊമാറ്റോയില്‍ പുതിയ വിവാദം. ഭക്ഷണ വിതരണം തങ്ങളുടെ മത വികാരത്തെ വ്രണപ്പെടുത്തുന്നുവെന്ന് ചൂണ്ടിക്കാട്ടി വിതരണക്കാരായ ജീവനക്കാര്‍ സമരത്തിലേക്ക്. ജീവനക്കാരുടെ മത വികാരങ്ങളെ കമ്പനി ദുരുപയോഗം ചെയ്യുകയാണെന്നും വ്രണപ്പെടുത്തുകയാണെന്നും അവര്‍ വിതരണക്കാര്‍ ആരോപിച്ചു. 

ബീഫും പോര്‍ക്കും വിതരണം ചെയ്യുന്ന വിഷയത്തിലാണ് ഇപ്പോള്‍ വിവാദമുണ്ടായിരിക്കുന്നത്. പെരുന്നാള്‍ ദിനമായ തിങ്കളാഴ്ച വിതരണക്കാര്‍ സമരം നടത്തുമെന്ന് ജീവനക്കാരുടെ കൂട്ടായ്മ വ്യക്തമാക്കി. ഹിന്ദു, മുസ്ലീം മത വിഭാഗങ്ങളിലുള്ളവര്‍ സമരത്തിനുണ്ട്. 

ചില മുസ്ലീം റസ്റ്റോറന്റുകള്‍ സൊമാറ്റോയുമായി യോജിച്ച് പ്രവര്‍ക്കുന്നുണ്ടിപ്പോള്‍. ജീവനക്കാര്‍ക്കിടയിലെ ഹിന്ദു മതത്തില്‍പ്പെട്ട വിതരണക്കാര്‍ അവിടെ നിന്നുള്ള ബീഫ് വിതരണം ചെയ്യാന്‍ വിസമ്മതിച്ചു. പിന്നാലെ മുസ്ലീം ജീവനക്കാരോട് പോര്‍ക്ക് വിതരണം ചെയ്യാന്‍ കമ്പനി ആവശ്യപ്പെട്ടു. 

ജീവനക്കാര്‍ ഒറ്റക്കെട്ടാണ്. അവര്‍ക്കിടയില്‍ വിഭാഗീയത ഇല്ല. മത വികാരം വ്രണപ്പെടുത്തുകയാണിപ്പോള്‍. മെഡിക്കല്‍ സംരക്ഷണങ്ങളടക്കം തങ്ങള്‍ക്ക് നിഷേധിക്കുകയാണെന്നും തങ്ങള്‍ക്കെതിരെ അനാവശ്യ ആരോപണങ്ങളാണ് കമ്പനി ഉന്നയിക്കുന്നതെന്നും ജീവനക്കാരനായ മൗസില്‍ അക്തര്‍ വ്യക്തമാക്കി. 

നേരത്തെ സൊമാറ്റോ ഭക്ഷണം വിതരണം ചെയ്യാനെത്തിയ ജീവനക്കാരന്‍ ഹിന്ദുവല്ലെന്ന് പറഞ്ഞ് ഓര്‍ഡര്‍ ക്യാന്‍സല്‍ ചെയ്ത വ്യക്തിക്ക് കമ്പനി മറുപടി നല്‍കിയിരുന്നു. ഭക്ഷണത്തിന് മതമില്ലെന്നും ഭക്ഷണം തന്നെയാണ് മതമെന്നും കമ്പനി അന്ന് നിലപാടെടുത്തിരുന്നത്.