ഹൈദരാബാദ്‌: വനിതാ ജീവനക്കാരി നല്‍കിയ ലൈംഗിക അതിക്രമ പരാതിയില്‍ ക്യാപ്ടനെതിരെ എയര്‍ ഇന്ത്യ അന്വേഷണം പ്രഖ്യാപിച്ചു. ലൈംഗികച്ചുവയോടെ സംസാരിച്ചുവെന്നും താത്പര്യമില്ലെന്ന് പറഞ്ഞ് ഒഴിഞ്ഞു മാറിയിട്ടും നിര്‍ബന്ധിച്ചുവെന്നും വനിതാ പൈലറ്റ് പരാതിയില്‍ വ്യക്തമാക്കിയിട്ടുണ്ട്. 

പരിശീലന കാലയളവ് പൂര്‍ത്തിയാക്കപ്പോള്‍ മുതിര്‍ന്ന പൈലറ്റും പരിശീലകനുമായ ക്യാപ്ടന്‍ അത്താഴം കഴിക്കുന്നതിനായി ഹോട്ടലിലേക്ക് ക്ഷണിച്ചു. മുന്‍പ് ഒന്നിച്ച് വിമാനം പറത്തിയപ്പോഴെല്ലാം മാന്യമായ പെരുമാറ്റം ആയതിനാല്‍ ക്ഷണം സ്വീകരിച്ച് ഭക്ഷണം കഴിക്കുന്നതിനായി പോവുകയായിരുന്നു. എന്നാല്‍ ഹോട്ടലില്‍ എത്തിയതും അയാള്‍ കുടുംബ ജീവിതത്തില്‍ സംതൃപ്തനല്ലെന്ന കാര്യം പറയാന്‍ ആരംഭിച്ചുവെന്നും പിന്നീട് ലൈംഗികച്ചുവയുള്ള സംസാരത്തിലേക്ക് കടക്കുകയായിരുന്നുവെന്നും പരാതിക്കാരി പറയുന്നു. 

എന്നും ലൈംഗികബന്ധത്തില്‍ ഏര്‍പ്പെടാന്‍ താത്പര്യമുണ്ടാവില്ലേ? ഭര്‍ത്താവ് ഇവിടെയില്ലല്ലോ, എന്താണ് ചെയ്യുക എന്ന തരത്തിലാണ് സംസാരം ഉണ്ടായത്. ഇത്തരം കാര്യങ്ങള്‍ സംസാരിക്കാന്‍ താത്പര്യമില്ലെന്ന് പറഞ്ഞ് ടാക്‌സി വിളിച്ച് താന്‍ മടങ്ങിപ്പോരുകയായിരുന്നു എന്നും എയര്‍ ഇന്ത്യയ്ക്ക് നല്‍കിയ പരാതിയില്‍ വനിതാ പൈലറ്റ് വ്യക്തമാക്കി. മെയ് അഞ്ചിന് ഹൈദരാബാദിലെ റസ്‌റ്റോറന്റില്‍ വച്ചാണ് തനിക്ക് ദുരനുഭവം ഉണ്ടായതെന്നും അവര്‍ പറഞ്ഞു. സംഭവത്തില്‍ എയര്‍ ഇന്ത്യ ആഭ്യന്തര കമ്മിറ്റിക്ക് അന്വേഷണ ചുമതല കൈമാറി. അടിയന്തര നടപടി സ്വീകരിക്കുമെന്നും അധികൃതര്‍ അറിയിച്ചിട്ടുണ്ട്.