പനാജി: രോഗബാധിതനായി കഴിയുന്ന ഗോവ മുഖ്യമന്ത്രി മനോഹര്‍ പരീക്കറെ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി സന്ദര്‍ശിച്ചു. ഗോവയില്‍ അവധിക്കാലം ആഘോഷിക്കുന്നതിനിടെയാണ് മുന്‍ പ്രതിരോധ മന്ത്രി കൂടിയായ പരീക്കറുമായി കൂടിക്കാഴ്ചയ്ക്ക് രാഹുല്‍ സമയം കണ്ടെത്തിയത്. പരീക്കറിന്റെ ഓഫീസില്‍ വച്ചായിരുന്നു കൂടിക്കാഴ്ച. എത്രയും വേഗം പരീക്കര്‍ ആരോഗ്യവാനാവട്ടെയെന്നും രാഹുല്‍ ഗാന്ധി ആശംസിച്ചു. 

സ്വകാര്യ സന്ദര്‍ശനമായിരുന്നുവെന്നും രാഷ്ട്രീയം ചര്‍ച്ചയായില്ലെന്നും അദ്ദേഹം ട്വിറ്ററില്‍ കുറിച്ചു. ഗോവന്‍ നിയമസഭ മൂന്ന് ദിവസത്തെ ബജറ്റ് സമ്മേളനത്തിനായി ചേര്‍ന്ന ദിവസമാണ് സന്ദര്‍ശനത്തിന് രാഹുല്‍ തിരഞ്ഞെടുത്തതെന്നതും ശ്രദ്ധേയമാണ്. കോണ്‍ഗ്രസ് നേതാക്കളുമായും കൂടിക്കാഴ്ച നടത്തിയാണ് അദ്ദേഹം മടങ്ങിയത്.

 റഫാലിലെ രഹസ്യരേഖകളാണ് മനോഹര്‍ പരീക്കറിന്റെ മുഖ്യമന്ത്രി സ്ഥാനത്തിന് പിന്നിലെന്ന് രാഹുല്‍ ഗാന്ധി നേരത്തേ ആരോപിച്ചിരുന്നു. റഫാലിലെ പ്രധാന വെളിപ്പെടുത്തലായിരുന്ന 'ഗോവ ടേപ്പി' ല്‍ ഇതുവരെ എഫ്‌ഐആര്‍ പോലും രജിസ്റ്റര്‍ ചെയ്യാത്തത് ടേപ്പ് ആധികാരികമാണെന്നതിന്റെ തെളിവാണെന്നും കോണ്‍ഗ്രസ് അധ്യക്ഷന്‍ പറഞ്ഞിരുന്നു. റഫിലിലെ സുപ്രധാന രേഖകള്‍ ഗോവ മുഖ്യമന്ത്രിയുടെ കിടപ്പുമുറിയില്‍ ഉണ്ടെന്ന് ഗോവയിലെ ആരോഗ്യ വകുപ്പ് മന്ത്രി വിശ്വജിത്ത് റാണ മാധ്യമപ്രവര്‍ത്തകനോട് പറയുന്നതിന്റെ ശബ്ദരേഖയായിരുന്നു കഴിഞ്ഞ മാസം പുറത്ത് വന്നത്.