മുംബൈ: മഹാരാഷ്ട്ര നിയമസഭാ തെരഞ്ഞെടുപ്പില്‍ മത്സരിക്കാനൊരുങ്ങുന്ന മുംബൈ ബിജെപി അധ്യക്ഷന്‍ മംഗള്‍ പ്രഭാത് ലോധയ്ക്ക് 441 കോടി രൂപയുടെ ആസ്തി. നാമനിര്‍ദേശ പത്രികയ്‌ക്കൊപ്പം നല്‍കിയ സത്യവാങ്മൂലത്തിലാണ് ആസ്തി വിവരം വെളിപ്പെടുത്തിയത്. ചൊവ്വാഴ്ചയാണ് നാമനിര്‍ദേശ പത്രിക സമര്‍പ്പിച്ചത്. തുടര്‍ച്ചയായി ആറാം തവണയാണ് 63കാരനായ ലോധ മുംബൈയില്‍ മത്സരിക്കുന്നൊരുങ്ങുന്നത്.

ലോധയ്ക്കും ഭാര്യയ്ക്കുമായി 252 കോടിയുടെ ജംഗമ സ്വത്തുക്കളും 189 കോടിയുടെ സ്ഥാവര വസ്തുക്കളുമാണ് ഉള്ളത്. 14 ലക്ഷം രൂപയുടെ ജാഗ്വര്‍ വാഹനവും ഷെയറുകളും ബോണ്ടുകളുമായി ഒട്ടേറെ സമ്പാദ്യങ്ങളും 283 കോടിയുടെ ബാധ്യതയും അദ്ദേഹത്തിനുണ്ട്.

സൗത്ത് മുബൈയില്‍ അഞ്ച് അപാര്‍ട്‌മെന്റുകളും രാജസ്ഥാനില്‍ ഒരു അപാര്‍ട്‌മെന്റും കൈവശമുള്ള ലോധയുടെ കുടുംബം റിയല്‍ എസ്‌റ്റേറ്റ് ഇടപാടുകളും നടത്തുന്നുണ്ട്. മലബാര്‍ ഹില്‍ ഏരിയയില്‍ ലോധയ്ക്കും ഭാര്യയ്ക്കുമായി ഒരു വീടുമുണ്ട്. ലോധയ്‌ക്കെതിരേ അഞ്ച് ക്രിമിനല്‍ കേസുകള്‍ നിലനില്‍ക്കുന്നുണ്ടെന്നും സത്യവാങ്മൂലത്തില്‍ പറയുന്നു.