ശ്രീന​ഗർ : റാലിയിൽ  ദേശീയ പതാക തലകീഴായി പ്രദര്‍ശിപ്പിച്ചതിന് ബിജെപി നേതാവിനെതിരെ പൊലീസ് കേസെടുത്തു. ജമ്മു കശ്മീരിലെ കത്തുവ ജില്ലയിലാണ് സംഭവം. ബിജെപി നേതാവും കത്തുവ എംഎല്‍എയുമായ രാജീവ് ജാസ്രോതിയയ്‌ക്കെതിരെയാണ് പോലീസ് കേസെടുത്തത്. 

ദേശീയ പതാകയെ അപമാനിച്ചതിനാണ് ജാസ്രോതിയയ്ക്കെതിരെ പൊലീസ് എഫ്‌ഐആര്‍ രജിസ്റ്റര്‍ ചെയ്തിരിക്കുന്നത്. പ്രദേശവാസിയായ വിനോദ് നജ്‌വാന്‍ എന്നയാളുടെ പരാതിയെ തുടര്‍ന്നാണ്  എംഎൽഎയും കണ്ടാല്‍ അറിയാവുന്ന ഏതാനും പേര്‍ക്കെതിരേയും പൊലീസ് കേസെടുത്തത്. 

തദ്ദേശ തെരഞ്ഞെടുപ്പിന്റെ ഭാഗമായി ബിജെപി നേതാവായ രാഹുല്‍ ദേവ് ശര്‍മയുടെ നാമനിര്‍ദേശ പത്രിക സമര്‍പ്പിക്കുന്നതിന് മുന്നോടിയായി വ്യാഴാഴ്ച നടത്തിയ റാലിയിലാണ് ദേശീയ പാതക തലകീഴായി പ്രദര്‍ശിപ്പിച്ചത്. രണ്ട് കിലോമീറ്ററിലധികം പതാക തലകീഴായി കെട്ടി റാലി നടത്തിയതിന്റെ വീഡിയോ ദൃശ്യങ്ങള്‍ ഉള്‍പ്പെടെയാണ് എംഎല്‍എയ്ക്കും മറ്റ് നേതാക്കള്‍ക്കുമെതിരേ പരാതി നല്‍കിയത്.