ദാവങ്കരെ (കര്‍ണാടക): വായ്പ അനുവദിക്കാന്‍ ലൈംഗിക ബന്ധത്തിന് നിര്‍ബന്ധിച്ച ബാങ്ക് മാനേജര്‍ക്ക് യുവതിയുടെ മര്‍ദ്ദനം. കര്‍ണാടകയിലെ ദാവങ്കരയിലാണ് സംഭവം. സംഭവത്തെതുടര്‍ന്ന് ബാങ്ക് മാനേജറെ അറസ്റ്റ് ചെയ്തു.

യുവതിയെ മാനേജര്‍ വീട്ടിലേക്ക് ക്ഷണിച്ചെന്നും അവിടെയെത്തിയ യുവതി വീടിനകത്തുനിന്ന് മാനേജറെ വലിച്ചിഴച്ച് പുറത്തുകൊണ്ടുവന്ന് മര്‍ദ്ദിക്കുകയായിരുന്നെന്നുമാണ് റിപ്പോര്‍ട്ടുകള്‍. യുവതി മാനേജറെ മര്‍ദ്ദിക്കുന്നതിന്റെ ദൃശ്യങ്ങള്‍ സമൂഹമാധ്യമങ്ങളിലൂടെ വൈറലായിരുന്നു. 'റിയല്‍ മീ ടൂ' എന്ന പേരില്‍ പലരും വീഡിയോ ഷെയര്‍ ചെയ്തിട്ടുണ്ട്.

 മാനേജറെ യുവതി ചെരുപ്പും വടിയുമുപയോഗിച്ച് മര്‍ദ്ദിക്കുന്നത് വീഡിയോയില്‍ കാണാം. 15 ലക്ഷം രൂപയുടെ ബാങ്ക് ലോണിന് അപേക്ഷയുമായി എത്തിയപ്പോഴായിരുന്നു യുവതിയോട് ഈ സമീപനം. ഡിഎച്ച്എഫ്‌സി ബാങ്ക് മാനേജറാണ് അറസ്റ്റിലായതെന്നാണ് റിപ്പോര്‍ട്ടുകള്‍. യുവതിയുടെ പരാതിയെത്തുടര്‍ന്ന് മാനേജറിനെതിരെ കേസ് രജിസ്റ്റര്‍ ചെയ്തതായി പൊലീസ് പറഞ്ഞു.