ചെന്നൈ: വേദാന്ത സ്റ്റെര്ലൈററ്റ് വിരുദ്ധ സമരക്കാര്ക്ക് നേരെ പൊലീസ് നടത്തിയ വെടിവെയ്പ്പിനെതിരെ പ്രതിഷേധം ശക്തമാകുന്നു. സ്റ്റെര്ലൈറ്റ് കോപ്പര് യൂണിറ്റ് അടച്ചുപൂട്ടണം എന്നാവശ്യപ്പെട്ട് സിപിഎം സംസ്ഥാന സെക്രട്ടറി കെ.ബാലകൃഷ്ണന് അനിശ്ചിതകാല നിരാഹാര സമരം ആരംഭിച്ചു. നേതാക്കളായ കെ.കനകരാജ്,അര്ജുനന്,പുമയില്,പെരുമാള് എന്നിവരും സംസ്ഥാന സെക്രട്ടറിക്കൊപ്പം നിരാഹാരമിരിക്കുന്നുണ്ട്. ഇവരെ പൊലീസ് കസ്റ്റഡിയിലെത്തു. എന്നാല് നിരാഹാര സമരം അവസാനിപ്പിക്കാന് ഇവര് കൂട്ടാക്കിയിട്ടില്ല. ചെന്നൈയില് വിവിധ ഇടത് സംഘടനകളുടെ നേതൃത്വത്തില് പ്രതിഷേധ മാര്ച്ച് നടന്നു. ഡല്ഹി തമിഴ്നാട് ഭവന് മുന്നില് ഇടത് വിദ്യാര്ത്ഥി സംഘടനകള് പ്രതിഷേധം നടത്തി. ഡല്ഹി തമിഴ്നാട് ഭവന് മുന്നില് ഇടത് വിദ്യാര്ത്ഥി സംഘടനകള് പ്രതിഷേധം നടത്തി.
അതേസമയം ഇന്നുച്ചയ്ക്ക് സമരക്കാര്ക്ക് നേരെ വീണ്ടും പൊലീസ് വെടിയുതിര്ത്തു. ഇതില് ഒരാള് കൊല്ലപ്പെട്ടതോടെ മരണം പന്ത്രണ്ടായി. തൂത്തുക്കുടിയിലേയും തിരുനല്വേലിയിലേയും ഇന്റര്നെറ്റ് സംവിധാനങ്ങള് വിച്ഛേദിക്കാന് സര്ക്കാര് ഉത്തരവിറക്കി.വെടിവെയ്പ്പിനെതിരെ സോഷ്യല് മീഡിയയില് പ്രതിഷേധം ശക്തമായ സാഹചര്യത്തിലാണ് ആഭ്യന്തര സെക്രട്ടറി ഉത്തരവിറക്കിയത്. സംഭവത്തെക്കുറിച്ച് വിശദമായ റിപ്പോര്ട്ട് നല്കാന് തമിഴ്നാട് സര്ക്കാരിനോട് കേന്ദ്ര ആഭ്യന്തര മന്ത്രി രാജ്നാഥ് സിങ് ആവശ്യപ്പെട്ടു.
സ്റ്റെര്ലൈറ്റ് കോപ്പര് പ്ലാന്റിന്റെ രണ്ടാംഘട്ട വികസനം അനുവദിക്കരുത് എന്നാവശ്യപ്പെട്ടാണ് സമരം നടക്കുന്നത്. സമരത്തിന്റെ നൂറാംദിവസത്തില് തൂത്തുക്കുടി കലക്ടറേറ്റിലേക്ക് നടന്ന മാര്ച്ചാണ് സംഘര്ഷത്തില് കലാശിച്ചത്. 1996 ലാണ് തൂത്തുക്കുടിയില് സ്റ്റെര്ലൈറ്റ് കോപ്പര് പ്ലാന്റ് പ്രവര്ത്തനം തുടങ്ങിയത്. അന്ന് മുതല് വിവാദങ്ങളുടെ കേന്ദ്രവുമാണ് സ്ഥാപനം. പ്ലാന്റ് പ്രവര്ത്തനം മേഖലയിലെ പാരിസ്ഥിതികാവസ്ഥയെ പ്രതികൂലമായി ബാധിച്ചുവെന്ന് നിരവധി റിപ്പോര്ട്ടുകള് പുറത്തുവന്നിരുന്നു. പ്ലാന്റ് പ്രവര്ത്തനങ്ങള് നിര്ത്തിവയ്ക്കണം എന്നാവശ്യപ്പെട്ട് സമരക്കാര് സുപ്രീംകോടതിയേയും സമീപിച്ചിരുന്നു. പരിസ്ഥിതി നാശം സ്ഥിരീകരിച്ച കോടതി 100 കോടി രൂപ പിഴയടക്കാനാണ് നിര്ദേശിച്ചത്. പക്ഷേ, പ്ലാന്റ് പ്രവര്ത്തനം തുടരുകയായിരുന്നു.
വിപുലീകരണം നടന്നാല് ദക്ഷിണേഷ്യയിലെ രണ്ടാമത്തെ വലിയ കോപ്പര് സംസ്കണ പ്ലാന്റായി തൂത്തുക്കുടിയിലേത് മാറും. പ്രതിവര്ഷം 9 ലക്ഷം ടണ് കോപ്പര് ഉത്പാദിപ്പിക്കുന്ന പ്ലാന്റ് ചൈനയിലുണ്ട്, പക്ഷേ അത് ജനവാസമേഖലയിലല്ല. എന്നാല്, പ്രതിഷേധങ്ങള് കണക്കിലെടുക്കാതെ വികസനവുമായി മുന്നോട്ട് പോകാനാണ് സ്റ്റെര്ലൈറ്റ് ഇന്ട്രസ്ട്രീസിന്റെ തീരുമാനം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates