ലക്‌നൗ: ശബരിമല കേസ് തീര്‍പ്പാക്കിയതു പോലെ അയോധ്യാ കേസിലും വേഗത്തില്‍ തീരുമാനത്തിലെത്താന്‍ സുപ്രിം കോടതി നടപടിയെടുക്കണമെന്ന് കേന്ദ്ര നിയമമന്ത്രി രവിശങ്കര്‍ പ്രസാദ്. ബാബറിനെ നമ്മള്‍ എന്തിന് ആരാധിക്കണമെന്ന് രവിശങ്കര്‍ പ്രസാദ് ചോദിച്ചു.

അഖില ഭാരതീയ അധിവക്ത പരിഷത്തിന്റെ ദേശീയ സമ്മേളനം ഉദ്ഘാടനം ചെയ്തുകൊണ്ട് സുപ്രിം കോടതി ജഡ്ജിമാരെ സാക്ഷിയാക്കിയായിരുന്നു കേന്ദ്ര നിയമമന്ത്രിയുടെ പരാമര്‍ശങ്ങള്‍. രാമജന്മഭൂമി കേസ് എത്രയും വേഗം തീര്‍പ്പാക്കാന്‍ വ്യക്തിപരമായി സുപ്രിം കോടതിയോട് അഭ്യര്‍ഥിക്കുകയാണെന്ന് രവിശങ്കര്‍ പ്രസാദ് പറഞ്ഞു. ശബരിമല കേസില്‍ അതിവേഗം വിധി പറഞ്ഞ സുപ്രിം കോടതിക്ക് അയോധ്യാ കേസിലും അതിനു കഴിയേണ്ടതാണ്. എന്തുകൊണ്ടാണ് രാമജന്മഭൂമി കേസ് എഴുപതു വര്‍ഷമായിട്ടും തീര്‍പ്പാക്കാതെ ഇരിക്കുന്നതെന്ന് രവിശങ്കര്‍ പ്രസാദ് ചോദിച്ചു.

ഭരണഘടനയില്‍ രാമനെക്കുറിച്ചും കൃഷ്ണനെക്കുറിച്ചും അക്ബറിനെക്കുറിച്ചും പരാമര്‍ശമുണ്ട്. എന്നാല്‍ അതില്‍ ബാബറിനെക്കുറിച്ച് ഒന്നുമില്ല. ഇതു പറയുമ്പോള്‍ രാജ്യത്ത് മറ്റു തരത്തില്‍ വിവാദങ്ങള്‍ ഉണ്ടാവുകയാണെന്ന് കേന്ദമമന്ത്രി പറഞ്ഞു.