തിരുവനന്തപുരം: 10 ദിവസത്തിന് ഇടയിൽ കേരളത്തിൽ റദ്ദാക്കിയത് 18 തീവണ്ടികൾ. ആളുകൾ ഇല്ലാതെ വന്നതോടെയാണ് കേരളത്തിലൂടെ ഓടുന്ന 18 തീവണ്ടികൾ റദ്ദാക്കിയത്. 

അതിഥി തൊഴിലാളികൾ തങ്ങളുടെ നാടുകളിലേക്ക് മടങ്ങി കൊണ്ടിരിക്കുന്നതിനാൽ ദീർഘദൂര സർവീസുകൾ മാത്രമാണ് നടത്തുന്നത്. ഇനി വരുന്ന ദിവസങ്ങളിൽ കൂടുതൽ ട്രെയ്നുകൾ റദ്ദാക്കിയേക്കും. യാത്രക്കാരിൽ കുറവ് വന്നതോടെ ആദ്യം കോച്ചുകൾ കുറച്ചാണ് റെയിൽവേ സർവീസ് നടത്തിയിരുന്നത്. 

രണ്ട് കോച്ചുകളിലേക്കുള്ള യാത്രക്കാർ മാത്രമാണ് ശനിയാഴ്ച മം​ഗലാപുരത്തേക്ക് പോയ അന്ത്യോദയ എക്സ്പ്രസിൽ ഉണ്ടായത്. നിലവിർ മലബാർ ഭാ​ഗത്ത് നിന്നും ബം​ഗളൂരുവിലേക്ക് സർവീസ് ഇല്ലാത്ത അവസ്ഥയാണ്. ബം​ഗളൂരുവിലേക്കുള്ള കൊച്ചുവേളി-ബാനസ്വാടിയും എറണാകുളം-ബനസ്വാടിയും സർവീസ് നിർത്തിയിരുന്നു. 

യശ്വന്ത്പൂർ-കണ്ണൂർ തീവണ്ടിയും തിങ്കളാഴ്ചയോടെ റദ്ദാക്കി. രാത്രി 9ന് ശേഷം റെയിൽവേ സ്റ്റേഷനിൽ വന്നിറങ്ങുന്നവർക്ക് മറ്റ് യാത്രാ മാർ​ഗങ്ങൾ മുന്നിലില്ല എന്നതാണ് യാത്രക്കാർ കുറയാനുള്ള കാരണങ്ങളിൽ ഒന്ന്. സംസ്ഥാനത്ത് മിനി ലോക്ക്ഡൗൺ നിയന്ത്രണങ്ങൾ വന്നതോടെ യാത്രക്കാരുടെ എണ്ണം ഇനിയും കുറയും.