ഇടുക്കി: അടിസ്ഥാന സൗകര്യങ്ങൾ ഇല്ലാത്തതിനാൽ ഇടുക്കി ജില്ലയിലെ ഇടമലക്കുടിയിൽ രോ​ഗിയുമായി വീണ്ടും ദുരിത യാത്ര. മരക്കമ്പിൽ തുണി ചുറ്റി അതിൽ കിടത്തി രോഗിയെ ആശുപത്രിയിൽ എത്തിച്ചു. വളയംപാറ കുടിയിൽ നിന്നും 55 കാരിയായ പൂമണിയെയാണ് സൊസൈറ്റികുടിയിലെ ആശുപത്രിയിൽ എത്തിച്ചത്.

മഴയെത്തുടർന്ന് കമ്പിൽ കെട്ടി കിടത്തിയ രോ​ഗിയെ നനയാതിരിക്കാൻ പ്ലാസ്റ്റിക് കൊണ്ട് പൊതിഞ്ഞാണ് ഇടമലക്കുടിയിലെ ജനങ്ങൾ കാടും തോടും താണ്ടി മറുകരയിലെത്തിച്ചത്. കഴിഞ്ഞ ദിവസം വയോധികനായ രോ​ഗിയെ മാങ്കുളം ആനകുളത്ത് ആളുകൾ ചുമന്ന് എത്തിച്ചിരുന്നു.

ഇടുക്കി ഇടമലക്കുടി ഗൂഡല്ലാർകുടി സ്വദേശിയായ 75 വയസ്സുകാരൻ മാലയപ്പനെയാണ് ചികിത്സയ്ക്കായി കിലോമീറ്ററുകളോളം ചുമന്നത്. അടിയന്തര സാഹചര്യങ്ങളിൽ കൃത്യസമയത്ത് ആശുപത്രിയിലെത്തിക്കാൻ ഗതാഗതസൗകര്യമില്ലാത്തത് വലിയ ദുരിതമാണ് പ്രദേശത്ത് ഉണ്ടാക്കുന്നത്.