കൊല്ലം: ശക്തികുളങ്ങര ഹാർബറിൽ ശുചിമുറിയിൽ ശരീരഭാ​ഗങ്ങൾ കണ്ടെത്തിയ സംഭവത്തിൽ പ്രതി പിടിയിൽ. കൊട്ടിയം സ്വദേശി ശ്യാംജിത്ത് ആണ് പൊലീസിന്റെ പിടിയിലായത്. ചവറ കൊട്ടുകാട് സ്വദേശി നിസാർ (55) ആണ് കൊല്ലപ്പെട്ടത്. നിസാറിനെ കൊലപ്പെടുത്തി ടാങ്കിൽ തള്ളിയെന്ന് പ്രതി പൊലീസിനോട് സമ്മതിച്ചു.

കഴിഞ്ഞ മാസം 30 നാണ് ഹാർബറിലെ ശുചിമുറി മാലിന്യം നീക്കം ചെയ്യാൻ സ്ലാബ് തുറന്നപ്പോൾ മൃതദേഹ അവശിഷ്ടം കണ്ടെത്തിയത്. പൂർണമായും ജീർണിച്ച മൃതദേഹം മൃഗത്തിന്റേതാണെന്നായിരുന്നു ആദ്യം കരുതിയത്. വെറ്ററിനറി സർജൻ നടത്തിയ പരിശോധനയിലാണ് മനുഷ്യന്റേതാണെന്ന് തിരിച്ചറിഞ്ഞത്. തുടർന്ന് നടത്തിയ തിരച്ചിലിൽ തലയോട്ടി കണ്ടെത്തി.

ഹാർബറിലെ ശുചിമുറികൾ വാടകയ്ക്ക് നൽകുന്നയാളാണ് കൊല്ലപ്പെട്ട നിസാർ. ഇയാൾ അവിടെത്തന്നെയാണ് താമസിച്ചിരുന്നത്. ശുചിമുറിയുടെ കരാറെടുത്തയാളുടെ ഡ്രൈവറാണ് പ്രതി ശ്യാംജിത്ത്. സംഭവദിവസം പ്രതിയെ നിസാർ ചീത്ത വിളിച്ചിരുന്നു. ഇതിൽ ദേഷ്യം പൂണ്ട പ്രതി നിസാറിനെ മർദ്ദിക്കുകയും, കമ്പി ഉപയോഗിച്ച് തലയ്ക്കടിച്ചു കൊലപ്പെടുത്തുകയുമായിരുന്നുവെന്ന് പൊലീസ് പറഞ്ഞു.