കേരളത്തിന്റെ പുതിയ മുഖ്യമന്ത്രിയെ ഇന്ന് പ്രഖ്യാപിച്ചേക്കും. അടിയന്തര മുസ്ലിം ലീഗ് നേതൃയോഗം ഇന്ന് മലപ്പുറത്ത് ചേരും. തമിഴ്‌നാട്ടില്‍ വിജയ് സര്‍ക്കാര്‍ ഇന്ന് വിശ്വാസ വോട്ട് തേടും. ഇന്നത്തെ 5 പ്രധാന വാര്‍ത്തകള്‍ ( Top 5 News Today) അറിയാം

കേരളത്തിന്റെ മുഖ്യമന്ത്രിയെ തീരുമാനിക്കുന്നതില്‍ അന്തിമ ചര്‍ച്ചകള്‍ ഇന്ന് നടക്കും. ഉച്ചയോടെ പുതിയ നേതാവിനെ പ്രഖ്യാപിച്ചേക്കുമെന്നാണ് സൂചന. രാഹുല്‍ഗാന്ധി പാര്‍ട്ടി പ്രസിഡന്റ് മല്ലികാര്‍ജുന്‍ ഖാര്‍ഗെ, സോണിയാഗാന്ധി എന്നിവരുമായി ആശയവിനിമയം നടത്തിയശേഷമാകും അന്തിമ പ്രഖ്യാപനം ഉണ്ടാകുക.

മുഖ്യമന്ത്രിയെ തീരുമാനിക്കുന്നതിനുള്ള ചർച്ചകൾ അനന്തമായി നീളുന്നതിനിടെ, മുസ്ലിം ലീ​ഗ് വിളിച്ച അടിയന്തര നേതൃയോഗം ഇന്ന് ചേരും. പാണക്കാട് സാദിഖലി ശിഹാബ് തങ്ങളുടെ വസതിയിൽ രാവിലെ 10ന് നടക്കുന്ന യോഗത്തിൽ 8 ഉന്നത നേതാക്കൾ പങ്കെടുക്കും. ലീഗ് മന്ത്രിമാരെ തീരുമാനിക്കുന്നതും ചർച്ചയാകും.

തമിഴ്നാട് നിയമസഭയിൽ ഇന്ന് വിശ്വാസ വോട്ടെടുപ്പ് നടക്കും. 234 അംഗ സഭയിൽ നിലവിൽ 120 പേരുടെ പിന്തുണയാണ് ടിവികെയ്ക്ക് ഉള്ളത്. എഐഎഡിഎംകെയിലെ വിമതവിഭാ​ഗം വിജയിന് പിന്തുണ പ്രഖ്യാപിച്ചിട്ടുണ്ട്. അതേസമയം വിജയ് സർക്കാരിനെ എതിർത്ത് വോട്ടുചെയ്യണമെന്ന് എഐഎഡിഎംകെ ഔദ്യോ​ഗിക വിഭാ​ഗം എംഎൽഎമാർക്ക് കത്തു നൽകിയിരിക്കുകയാണ്.

ഐപിഎല്ലില്‍ സൺറൈസേഴ്സ് ഹൈദരാബാദിനെ 82 റൺസിന് പരാജയപ്പെടുത്തി ഗുജറാത്ത് ടൈറ്റൻസ് പോയിന്റ് ടേബിളിൽ ഒന്നാമത് എത്തി. 169 റൺസ് വിജയലക്ഷ്യം തേടി ഇറങ്ങിയ ഹൈദരാബാദിന് 14.5 ഓവറിൽ 86 റൺസ് നേടാനേ കഴിഞ്ഞുള്ളു. 28 റൺസ് വഴങ്ങി മൂന്ന് വിക്കറ്റുകൾ നേടിയ ഗുജറാത്തിന്റെ ക​ഗിസോ റബാഡയാണ് കളിയിലെ താരം.

സാമ്പത്തിക കാര്യങ്ങളിൽ എടുത്ത തീരുമാനം ഗുണകരമാകും. സുഹൃത്തുക്കളുമായി നടത്തിയ ആശയവിനിമയം സന്തോഷം നൽകും. പുതിയ അവസരങ്ങൾ ലഭിക്കും.ജോലിയിൽ ഉയർച്ച നേടും. മുടങ്ങിയ കാര്യങ്ങൾ വീണ്ടും സജീവമാകും. യാത്രകളിൽ നിന്ന് ഗുണകരമായ അനുഭവങ്ങൾ ലഭിക്കും. തുടർ പഠനത്തിന് അവസരം ലഭിക്കും.