തിരുവനന്തപുരം: കേരളത്തിന്റെ വൈദ്യുതി മേഖലയെ കൂടുതൽ കാര്യക്ഷമവും ജനസൗഹൃദവുമാക്കുക എന്ന ലക്ഷ്യത്തോടെ ജനകീയ ഇടപെടലിന് തുടക്കമിട്ട് വൈദ്യുതി മന്ത്രി സണ്ണി ജോസഫ്. സംസ്ഥാനത്തിന്റെ ഊർജ്ജ സുരക്ഷയും ഉപഭോക്തൃ സേവനങ്ങളും മെച്ചപ്പെടുത്തുന്നതിനായി പൊതുജനങ്ങളിൽ നിന്ന് നേരിട്ട് അഭിപ്രായങ്ങളും നിർദ്ദേശങ്ങളും ക്ഷണിച്ചുകൊണ്ട് മന്ത്രി രംഗത്തെത്തി. തന്റെ ഔദ്യോഗിക ഫേസ്ബുക്ക് പേജിലൂടെയാണ്, ജനങ്ങളുടെ പങ്കാളിത്തത്തോടെയുള്ള വികസന പരിഷ്കാരങ്ങൾക്ക് മന്ത്രി സണ്ണി ജോസഫ് ആഹ്വാനം ചെയ്തത്.

വൈദ്യുതി വിതരണത്തിലെ പോരായ്മകൾ, ആധുനിക ബില്ലിംഗ് സംവിധാനങ്ങളിലെ തർക്കങ്ങൾ, വിവിധ ഗ്രാമീണ മേഖലകൾ നേരിടുന്ന ലോ വോൾട്ടേജ് പ്രശ്നങ്ങൾ എന്നിവയ്ക്ക് ശാശ്വത പരിഹാരം കാണുകയാണ് ഈ ജനകീയ ഇടപെടലിലൂടെ ലക്ഷ്യമിടുന്നത്. ഇതിന് പുറമെ പുതിയ സാങ്കേതിക വിദ്യകളുടെ നടപ്പാക്കൽ, സൗരോർജ്ജ വികസനം, കെഎസ്ഇബി ഓഫീസുകളിലെ ഉപഭോക്തൃ സേവനം മെച്ചപ്പെടുത്തൽ തുടങ്ങി വൈദ്യുതി വകുപ്പുമായി ബന്ധപ്പെട്ട ഏത് വിഷയത്തിലും പൊതുജനങ്ങൾക്ക് തങ്ങളുടെ നിർദ്ദേശങ്ങൾ കമന്റുകളിലൂടെ നേരിട്ട് പങ്കുവെക്കാവുന്നതാണ്.

ജനങ്ങളുടെ സജീവമായ പങ്കാളിത്തത്തിലൂടെ മാത്രമേ വൈദ്യുതി മേഖലയിൽ അർത്ഥവത്തായ വലിയ മാറ്റങ്ങൾ സാധ്യമാകൂ എന്ന് മന്ത്രി സണ്ണി ജോസഫ് വ്യക്തമാക്കി. പൊതുജനങ്ങളിൽ നിന്ന് ലഭിക്കുന്ന മികച്ച ശുപാർശകൾ വരും ദിവസങ്ങളിൽ കൃത്യമായി ക്രോഡീകരിച്ച് പുതിയ വൈദ്യുതി നയ രൂപീകരണത്തിൽ ഉൾപ്പെടുത്താനാണ് മന്ത്രാലയത്തിന്റെ തീരുമാനം.കേരളത്തിന്റെ വൈദ്യുതി മേഖലയിൽ കേരളത്തിന്റെ ഭാവി കൂടുതൽ ശക്തമാക്കാൻ ഈ നിർദ്ദേശങ്ങൾ അനിവാര്യമാണെന്നും അദ്ദേഹം പ്രത്യാശ പ്രകടിപ്പിച്ചു.

മന്ത്രിയുടെ പോസ്റ്റിൻറെ പൂർണ രൂപം

കേരളത്തിന്റെ വൈദ്യുതി മന്ത്രിയായി ചുമതലയേറ്റ വിവരം എല്ലാവരും അറിഞ്ഞു കാണുമല്ലോ.

കേരളത്തിന്റെ വൈദ്യുതി മേഖലയെ കൂടുതൽ കാര്യക്ഷമവും ജനസൗഹൃദവുമായതാക്കുവാൻ നിങ്ങളുടെ അഭിപ്രായങ്ങളും നിർദേശങ്ങളും വിലപ്പെട്ടതാണ്.

വൈദ്യുതി വിതരണം, ബിൽ സംവിധാനങ്ങൾ, ലോ വോൾട്ടേജ് പ്രശ്നങ്ങൾ, പുതിയ സാങ്കേതിക വിദ്യകൾ, സൗരോർജ വികസനം, ഉപഭോക്തൃ സേവനം തുടങ്ങി ഏത് വിഷയത്തിലും നിങ്ങൾക്ക് നിർദേശങ്ങളുണ്ടെങ്കിൽ കമന്റിലൂടെ പങ്കുവെക്കൂ.ജനങ്ങളുടെ പങ്കാളിത്തത്തോടെയാണ് മികച്ച മാറ്റങ്ങൾ സാധ്യമാകുന്നത്. നിങ്ങളുടെ നിർദേശങ്ങൾ കേരളത്തിന്റെ വൈദ്യുതി ഭാവിക്ക് കരുത്താകട്ടെ.