തൃശ്ശൂര്‍: തുടര്‍ച്ചയായി 100 ഹാഫ് മാരത്തോണ്‍ ചെയ്യുന്ന ആദ്യ മലയാളിയായി കണ്ണൂര്‍ മുഴുപ്പിലങ്ങാടി സ്വദേശി മരിയ ജോസ്. ജൂലൈ 7ന് ആരംഭിച്ച മാരത്തണ്‍ ഇന്ന് തൃശ്ശൂരില്‍ 100 ദിവസം പൂര്‍ത്തിയാക്കി. നൂറ് ദിവസം കൊണ്ട് ആകെ 2110 കി.മീ ഓടിയാണ് മരിയ ജോസ് ഈ നേട്ടം സ്വന്തമാക്കിയത്. ജില്ലാ കലക്ടര്‍ അര്‍ജുന്‍ പാണ്ഡ്യന്‍ മരിയ ജോസിനെ ഹാരമണിയിച്ച് അനുമോദിച്ചു.

ഗോവ, തമിഴ്‌നാട് എന്നീ സംസ്ഥാനങ്ങളിലും കേരളത്തിലെ 7 ജില്ലകളിലുമായാണ് ഹാഫ് മാരത്തോണ്‍ പൂര്‍ത്തിയാക്കിയത്. അപൂര്‍വ്വമായ ഈ നേട്ടം കൈവരിക്കുന്നതിന്റെ ഭാഗമായി 67-ാം ദിവസത്തെ ഹാഫ് മാരത്തോണും തൃശ്ശൂരില്‍ വച്ചായിരുന്നു സംഘടിപ്പിച്ചത്. റിട്ട. പൊലീസ് ഉദ്യോഗസ്ഥനായ മരിയ ജോസ് റേസ് വാക്കിങ്ങില്‍ ദേശീയ-അന്തര്‍ദേശീയ മെഡലുകള്‍ നേടിയിട്ടുണ്ട്. മാരത്തോണുകള്‍ പങ്കെടുത്തു തുടങ്ങിയിട്ടു അധികകാലമായിട്ടില്ല. ജീവിതശൈലീ രോഗങ്ങളില്‍ നിന്നുള്ള മോചനവും, ഹൃദയാരോഗ്യ സംരക്ഷണവും, ലഹരി വിരുദ്ധ സന്ദേശവും ഈ മാരത്തോണ്‍ ചലഞ്ചിലൂടെ അദ്ദേഹം മുന്നോട്ടുവയ്ക്കുന്നു.

എന്‍ഡ്യൂറന്‍സ് അത്ലറ്റ് സ് ഓഫ് തൃശ്ശൂര്‍, ഫിറ്റ്‌നെസ്സ് മെസ്സഞ്ചര്‍, ഫിറ്റ്‌നെസ് ഫ്രീക്ക്‌സ്,പാറളം റണ്ണേഴ്‌സ് ആന്‍ഡ് പാല്‍സ് തുടങ്ങിയ സ്‌പോര്‍ട്‌സ് ക്ലബുകളാണ് ഈ കായികക്കൂട്ടായ്മ സംഘടിപ്പിച്ചത്. കേരളത്തിലെ വിവിധങ്ങളായ റണ്ണിംഗ് ക്ലബ്ബുകളും കായികപ്രേമികളും പല ദിവസങ്ങളിലായി ഈ റെക്കോര്‍ഡ് ശ്രമത്തിന്റെ ഭാഗമാകുകയുണ്ടായി.