തൃശൂര്‍: വാഹനങ്ങള്‍ വിവാഹ ആവശ്യങ്ങള്‍ക്ക് എന്ന് പറഞ്ഞ് വാടകയ്ക്ക് എടുത്തു മറിച്ചു വില്‍പന നടത്തുന്ന സംഘത്തിലെ ഒരാളെ പൊലീസ് അറസ്റ്റ് ചെയ്തു. വാടാനപ്പിള്ളി പുതിയവീട്ടില്‍   മുല്ല റാഫിയെന്ന് (48) വിളിക്കുന്ന റാഫിയെ ചേര്‍പ്പ് സിഐ ടി വി ഷിബുവിന്റെ നേതൃത്വത്തിലാണ് അറസ്റ്റ് ചെയ്തത്.
 
ചിറക്കല്‍ സ്വദേശി സുധീറിന്റെ കാറ് നാലുമാസം മുമ്പാണ് ഇയാള്‍ വാടകയ്ക്ക് എടുത്തത്. വാഹനം തിരിച്ചു കിട്ടാത്തതിനെ തുടര്‍ന്ന് നല്‍കിയ പരാതിയുടെ അന്വേഷണത്തിലാണ് പ്രതിയെ പിടികൂടിയത്. ഈ വാഹനം തമിഴ്‌നാട്ടിലേക്ക് വില്‍പ്പനക്കായി കൊണ്ടുപോയി എന്നാണ് പറയുന്നത്. വാഹനം ഇതുവരെയും കണ്ടെത്താന്‍ കഴിഞ്ഞിട്ടില്ല.

ഇയാളുടെ പേരില്‍ ജില്ലയിലെ വിവിധ പൊലീസ് സ്‌റ്റേഷനുകളില്‍ സമാനമായ നിരവധി  കേസുകളുണ്ടെന്നു പൊലീസ് പറഞ്ഞു.