തിരുവനന്തപുരം: മറ്റ് വൻകിട മെട്രോ ന​ഗരങ്ങളെ അപേക്ഷിച്ച് ഇന്ത്യയിൽ ഏറ്റവും മികച്ച ജീവിത നിലവാരം വാ​ഗ്ദാനം ചെയ്യുന്നത് കേരളത്തിന്റെ തലസ്ഥാനമായ തിരുവനന്തപുരമാണെന്നു സോഹോ സ്ഥാപകനും സിഇഒയുമായ ശ്രീധർ വെമ്പു. ഒരു പൊതു ചടങ്ങിൽ സംസാരിക്കവേയാണ് അദ്ദേഹം തിരുവനന്തപുരത്തെ പ്രശംസിച്ചു.

ബം​ഗളൂരു, മുംബൈ തുടങ്ങിയ മെട്രോ ന​ഗരങ്ങൾ നേരിടുന്ന ​ഗതാ​ഗതക്കുരുക്ക്, വായു മലിനീകരണം, അമിതമായ ജീവിതച്ചെലവ് തുടങ്ങിയ പ്രശ്നങ്ങളുമായി താരതമ്യം ചെയ്താണ് അദ്ദേഹത്തിന്റെ നിരീക്ഷണങ്ങൾ.

അദ്ദേഹത്തിന്റെ വാക്കുകൾ

'എനിക്ക് തിരുവനന്തപുരത്ത് വരാൻ വലിയ ഇഷ്ടമാണ്. മിക്കവാറും ഇന്ത്യയിൽ തന്നെ ഏറ്റവും മികച്ച ജീവിത നിലവാരമുള്ള ന​ഗരമായിരിക്കും ഇത്. ഇക്കാര്യം പുറത്ത് ഉച്ചത്തിൽ പറയാൻ എനിക്ക് പേടിയാണ്. കാരണം ഈ നന്മയ്ക്ക് ആരുടേയെങ്കിലും ദൃഷ്ടി തട്ടിയാലോ എന്നു ഞാൻ ഭയപ്പെടുന്നു.'

'ബം​ഗളൂരു, മുംബൈ, ചെന്നൈ ന​ഗരങ്ങളിലുള്ളവരുടെ ട്വീറ്റുകൾ നോക്കു. അവിടുത്തെ സംരംഭകരെല്ലാം ജീവിത നിലവാരത്തെക്കുറിച്ച് പരാതി പറയുന്നവരാണ്. എന്നാൽ കേരളത്തിൽ ചില സഹസ്യക്കൂട്ടുകളുണ്ട്. അത് കേരളത്തിലുടനീളം കാണാം. അതു കാത്തുസൂക്ഷിക്കേണ്ടതാണ്'- അദ്ദേഹം വ്യക്തമാക്കി.