തിരുവനന്തപുരം: സ്വര്‍ണ കളളക്കടത്ത് കേസിലെ എന്‍ഐഎ അന്വഷണം കൃത്യമായ രീതിയിലെന്ന് മുഖ്യമന്ത്രി. കേസില്‍ പങ്കുളള എല്ലാ വമ്പന്മാരും കൊമ്പന്മാരും കുടുങ്ങട്ടെ. തന്റെ ഓഫീസിനെ കുറിച്ചും അന്വേഷണമാകാം. വസ്തുതകള്‍ പുറത്തുവരുന്നതില്‍ ചിലര്‍ക്ക് വല്ലാത്ത നെഞ്ചിടിപ്പെന്നും മുഖ്യമന്ത്രി പിണറായി വിജയന്‍ മാധ്യമങ്ങളോട് പറഞ്ഞു.

കളളക്കടത്ത് കേസിന്റെ ഭാഗമായി എന്‍ഐഎ അന്വേഷണം മുഖ്യന്ത്രിയുടെ ഓഫീസിലേക്ക് നീട്ടാല്‍ അത് പ്രതിച്ഛായയ്ക്ക് മങ്ങല്‍ ഏല്‍പ്പിക്കില്ലേ എന്ന ചോദ്യത്തിന് എന്തിനാണ് മുന്‍വിധിയോട് കൂടി കാര്യങ്ങളെ കാണുന്നതെന്ന് പിണറായി വിജയന്‍ ചോദിച്ചു. അവര്‍ സ്വതന്ത്രമായി അന്വേഷിക്കട്ടെ. വസ്തുതകള്‍ പുറത്തുവരട്ടെ. അപ്പോള്‍ തെളിവുകളുടെ അടിസ്ഥാനത്തില്‍ നടപടികള്‍ സ്വീകരിക്കും. ആരെയും സംരക്ഷിക്കുന്ന നിലപാട് സര്‍ക്കാര്‍ സ്വീകരിക്കില്ലെന്നും മുഖ്യമന്ത്രി ആവര്‍ത്തിച്ചു. 

മുന്‍ പ്രിന്‍സിപ്പല്‍ സെക്രട്ടറി ശിവശങ്കരന്‍ വിവാദ വനിതയുമായി ബന്ധപ്പെട്ടു എന്ന വിവരം പുറത്ത് വന്നതിന് പിന്നാലെ അദ്ദേഹത്തെ മാറ്റി. യുഡിഎഫിന്റെ കാലത്ത് ഇങ്ങനൊരു നടപടി സ്വപ്നം കാണാനാവില്ല. നിലവില്‍ അദ്ദേഹത്തിന് എതിരെ മറ്റു നടപടികള്‍ എടുക്കാന്‍ ആവശ്യമായ വസ്തുതകള്‍ ഇല്ല. വസ്തുതകളുടെ അടിസ്ഥാനത്തിലാണ് നടപടി സ്വീകരിക്കുക. ശിവശങ്കരനെതിരെ തെളിവുണ്ടെങ്കില്‍ സംരക്ഷിക്കില്ല, കടുത്ത നടപടിയുണ്ടാകുമെന്നും മുഖ്യമന്ത്രി വ്യക്തമാക്കി.

പ്രതിയായ സ്വപ്‌ന സുരേഷിന്റെ ഐടി വകുപ്പിന് കീഴിലുളള നിയമനത്തില്‍ അന്വേഷണം ആരംഭിച്ചതായി മുഖ്യമന്ത്രി അറിയിച്ചു. സ്വപ്‌ന സുരേഷിന്റെ നിയമനത്തില്‍ വീഴ്ച സംഭവിച്ചിട്ടുണ്ടോ എന്ന് ചീഫ് സെക്രട്ടറിയും ധനകാര്യസെക്രട്ടറിയും അന്വേഷിക്കും. അന്വേഷണത്തില്‍ വീഴ്ച കണ്ടെത്തിയാല്‍ വേണ്ട നടപടികള്‍ സ്വീകരിക്കുമെന്നും മുഖ്യമന്ത്രി പറഞ്ഞു.

അന്വേഷണത്തിന്റെ ഭാഗമായി നിയമനത്തില്‍ വീഴ്ചകളുണ്ടോ എന്ന് അറിയട്ടേ. അല്ലാതെ ഓരോരുത്തരുടെയും സങ്കല്‍പ്പത്തിന്റെ പേരില്‍ നടപടിയെടുക്കാനാകില്ലെന്നും അദ്ദേഹം പറഞ്ഞു.