കൊട്ടിയൂര്‍: പ്രായപൂര്‍ത്തിയാകാത്ത പെണ്‍കുട്ടിയെ വൈദീകന്‍ പീഡിപ്പിച്ച കേസിലെ രണ്ടാം പ്രതി കീഴടങ്ങി. ഹൈക്കോടതിയുടെ നിര്‍ദേശപ്രകാരം തങ്കമ്മ നെല്ലിയാനിയാണ് കീഴടങ്ങിയിരിക്കുന്നത്. 

ഫാദര്‍ റോബിന്റെ കുറ്റകൃത്യം മറയ്ക്കാന്‍ ശ്രമിച്ചു എന്നതാണ് തങ്കമ്മയ്‌ക്കെതിരായ കുറ്റം.പേരാവൂര്‍ പൊലീസ് സ്റ്റേഷനില്‍ എത്തിയാണ് തങ്കമ്മ കീഴടങ്ങിയത്.

പ്രതികളുടെ മുന്‍കൂര്‍ ജാമ്യാപേക്ഷ പരിഗണിച്ചപ്പോഴാണ് അഞ്ച് ദിവസത്തിനകം അന്വേഷണ ഉദ്യോഗസ്ഥര്‍ക്ക് മുന്നില്‍ കീഴടങ്ങണമെന്ന് ഹൈക്കോടതി ഇവരോട് നിര്‍ദേശിച്ചത്. കീഴടങ്ങുന്നതിന് അനുവദിച്ച സമയം ഇന്ന് അവസാനിക്കാനിരിക്കെയാണ് തങ്കമ്മയുടെ കീഴടങ്ങല്‍.

കേസില്‍ പ്രതിചേര്‍ക്കപ്പെട്ട വയനാട് മുന്‍ സിഡബ്ല്യസി ചെയര്‍മാന്‍ ഫാ.തോമസ് ജോസഫ് തേരകം വെള്ളിയാഴ്ച അന്വേഷണ സംഘത്തിന് മുന്‍പാകെ കീഴടങ്ങിയിരുന്നു. ഇതുകൂടാതെ പ്രതികളായ സിസ്റ്റര്‍ ബെറ്റി, സിസ്റ്റര്‍ ഒഫീലിയ എന്നിവരും കീഴടങ്ങിയിരുന്നു.